انگلینڈ پاکستان نا برخلاف ٹی ٹونٹی سیریز کن 14 باسکی اسکواڈ نا پڑو کرے

لندن (مانیٹرنگ ڈیسک) انگلینڈ پاکستان نا برخلاف مسہ میچ آتا ٹی ٹونٹی سیریز کن 14 باسکی سکواڈ نا پڑو ءِ کرینے۔ انگلش کرکٹ بورڈ نا کنڈآن جاری انگا بیان نا رداٹ انگلش ٹیم نا کماشی ءِ این مورگن کیک، وخت اس کہ ڈیوڈ مالان و کرس جورڈن ٹیم اٹ پدی بسنو۔ ایلو گوازی گر تے ٹی معین علی، جونی بیئرسٹو، ٹام بینٹن، سیم بیلنگز، ٹام کیرن، جو ڈینلی، لوئس گریگوری، کرس جورڈن اوار ءُُ۔ داڑان بیدس ثاقب محمود، ڈیوڈ مالان، عادل رشید، جیسن روئے و ڈیوڈ ویلی ءِ ہم ٹیم اٹ اوار کننگانے۔ یات سلے کہ پاک انگلینڈ ٹی ٹونٹی سیریز نا اولیکو میچ اولڈ ٹریفڈ اٹ 28 اگست، ارٹمیکو میچ 30 اگست وخت اس کہ مسٹمیکو او گڈیکو میچ یکم ستمبر آ مریک۔ ایلو کنڈ آ انگلش کرکٹ ٹیم نا ہیڈ کوچ آن پد ٹیسٹ ٹیم نا کیپٹن جو روٹ ہم اینو دورہ پاکستان نا مخ تفی ءِ کرے۔ ساؤتھمپٹن ٹیسٹ میچ آن پد میڈیا تون ہیت وگپ کرسا او پارینے کہ پاکستان اٹ ہننگ او کرکٹ گوازی کننگ نا خواہندار اُٹ۔ او پارینے کہ پاکستان کرکٹ گوازی کننگ کن گچین ءُُ ملک اسے، اوڑے کرکٹ گوازی کننگ ءِ اہم ءُُ وارخواہی اس تکوہ۔ جو روٹ مستی پارینے کہ بدقسمتی اٹ دا فیصلہ ءِ ای آخا وخت اس کہ بورڈ ءِ کروئی ءِ۔ او پارینے کہ پاکستان اٹ جوان ءُُ فلیٹ پچ ءُُ دا کرکٹ آن پد اوڑدے گوازی کننگ جوان لگک۔