آئی سی سی نا ودوک آ پریشر نا مون آ سلہہ بٹنگ نا فیصلہ

کینبرا (مانیٹرنگ ڈیسک) انٹرنیشنل کرکٹ کونسل (آئی سی سی) ودوک آ پریشر نا مون آ سلہہ بٹنگ نا فیصلہ کرے۔ پگہ ٹی 20 ورلڈ کپ ءِ کینسل کننگ نا فیصلہ ءِ بنفنگ نا گمان ارے۔ انٹرنیشنل ایونٹ نا کینسلی آن بھارت نا ڈومیسٹک انڈین پریمیئر لیگ (آئی پی ایل) نا کسر ساف مریک۔ بھارت کرکٹ اینڈ کنٹرول بورڈ (بی سی سی آئی) مالو آن پارینے کہ تینا لیگ انا بابت اٹ پین انتظار کننگ کپرہ۔ ایونٹ نا تیاری تے بنا کننگ اُٹ، آسٹریلیا سال آ اکتوبر اٹ ورلڈ کپ نا میلہ ءِ خلنگ نا خواہندار ءِ۔ ایلو کنڈآ بھارت کرکٹ اینڈ کنٹرول بورڈ (بی سی سی آئی) ہم ایہن تو سال انا ایونٹ نا مہمانداری آن اسہ کنڈ مننگ کن تیار خننگپک۔ حوال نا رداٹ آسٹریلوی میڈیا دعویٰ کرینے کہ اینخو اکتوبر، نومبر اٹ شیڈول ٹونٹی 20 ورلڈ کپ ءِ کینسل کننگ نا فیصلہ کننگانے۔ پگہ آئی سی سی بورڈ میٹنگ اٹ پک انگا پڑو ءِ کننگک۔ داڑتون اوار انڈین پریمیئر لیگ (آئی پی ایل) نا اینخو اڈ تننگ کن بھارتی بورڈ ءِ ہمو ونڈو رسینگک ہراڑا بنا غان اونا نظر شاغوک ئس۔ اونا خاطر آن وہ آسٹریلیا ٹی شیڈول ایونٹ نا کینسل کرفنگ کن کوشست کریکہ، رپورٹ اٹ پاننگانے کہ بھارت اٹ کورونا وائرس نا حالیت بھاز خراب ءِ۔ ہندا سوب آن ایونٹ ءِ یو اے ای یا سری لنکا غا گدریفنگ کینہ۔ بھارتی ٹیم ستمبر اٹ ٹی 20 نا میچ آتا سیریز کن آسٹریلیا نا کنڈ آ مون کرے۔ آئی سی سی نا جمعہ نا میٹنگ اٹ کینسل مروک آ ٹورنامنٹ ءِ ری شیڈول کننگ نا گمان اف ولے کرکٹ آسٹریلیا نا اُست خواہی ءِ کہ اودے سال آ اکتوبر اٹ ٹی 20 ورلڈ کپ نا مہمانداری بایدے رسینگے۔ 2021ء نا ایونٹ ءِ بھارت اٹ مروئی ءِ و بھارت کرکٹ اینڈ کنٹرول بورڈ (بی سی سی آئی) نا مہمانداری آن دو خلاسی نا ہچ ءُ ارادہ اس اف۔ دا حالیت اٹ آسٹریلیا ءِ میگا ایونٹ نا مہمانداری کن 2022ء نا انتظار کروئی تمک۔ اگہ آئی پی ایل اینخو مس و آسٹریلوی ٹیم ستمبر اٹ انگلینڈ آ کاہک تو ولدا گوازی گرک اوکان ڈائریکٹ بھارت، یواے ای یا سری لنکا آئی پی ایل اٹ بشخ ہلنگ کن ہننگ کارہ، دا حالیت اٹ اوفک ڈبل قرنطینہ آن بچرہ۔