کورونا وائرس‘ مخالفت آن پد برازیل فٹ بال لیگ نا 9 اگست آن بنا نا پڑو

برازیل (مانیٹرنگ ڈیسک) برازیلین فٹ بال کنفیڈریشن (سی بی ایف) کورونا وائرس ہلوک آ ناجوڑی نا سوب آن ودی مروک آ ساڑی حالیت آتیٹی علاقائی کمامدار آتا مخالفت آن پد ہم قومی برازیل فٹ بال لیگ ءِ ولدا بنا کننگ کن 9 اگست نا تاریخ ءِ گچین کرینے۔ برازیلین فٹ بال کنفیڈریشن (سی بی ایف) نا رداٹ 20 ٹیم تا ارٹمیکو ڈویژن اسہ دے اس پد ولدا بنا مریک۔ ساڑی حالیت آتیٹی ریو ڈی جنیرو ٹی دا وخت اسکان بیرہ اسہ ریاستی چمپئن شپ ولدا بنا مسنے ہراکہ جھیڑہ غاتا گواچی مسنے انتئے کہ برازیل اٹ کورونا وائرس آن مروک آ کہوک آتا کچ 65 ہزار آن گدرینگانے ہرا دنیا ٹی زیات کہوک آ ملک آتیٹی مسٹمیکو نمبر آٹے۔ ساؤ پاؤلو نا گورنر، جواؤ ڈوریا تینا اسہ بیان اسے ٹی پارینے کہ مارچ نا نیام اٹ ہلوک آ ناجوڑی نا سوب آن ریاست نا ٹیمک قومی ٹورنامنٹ اٹ ہمو وخت اسکان بشخ ہلنگ کپسہ ہراتم اسکان کہ اوفک تینا علاقائی چمپئن شپ ءِ چٹفپس ہرا چٹانو اوفتا مسہ راؤنڈ آک داسکان گوازی متنو۔ جواؤ ڈوریا پارینے کہ 9 اگست آن سی بی ایف نا ولدا بنا مروک آ فیصلہ نا بارواٹ ریاست ساؤ پاؤلو نا حکومت آن مست سلاہ کننگتنے۔ سی بی ایف تینا ویب سائٹ آ اسہ بیان اسے نا ورندی ٹی پارینے کہ ساؤ پاؤلو نا 20 آن 19 کلب آتیٹی کل بندغ آک گوازی کننگ کن ووٹ تسوسُر۔ او ساؤ پاؤلو نا کلب آک سی بی ایف تون حال احوال آن تینا پوزیشن ءِ پک کریسُر۔