دینی و دنیاوی تعلیم ءِ یکجا کرسا سائنسی علم ءِ مونی دننگ وخت انا گرج ءِ،پروفیسر احسن اقبال

مدرسہ غاتا طالب علم آتے ساڑی دور انا خواست آتتون ہم گرنچ علم و چاہنداری تیان شپ کروئی مریک

0

Get real time updates directly on you device, subscribe now.

اسلام آباد، بنجائی وزیر ڈٹ بندی، شونداری وخصوصی گام گیج پروفیسر احسن اقبال پارینے کہ دینی و پوسکن تعلیم ءِ یکجا کرسا پٹ وپول، سائنسی علم و پوسکنوڑ ءِ مونی دننگ وخت انا اہم گرج ءِ، مدرسہ غاتا طالب علم آتے ساڑی دور انا خواست آتتون ہم گرنچ علم و چاہنداری تیان شپ کروئی مریک تانکہ او قومی شونداری ٹی گچین کڑد ادا کننگ کیر۔ او جمعیت طلبہ عربیہ پاکستان نا کنڈآن ”بدلینگوک آ دنیا ٹی اسلامی مدرسہ غاتا کڑد:خواست، چیلنج، وارخواہی و اصلاحات“ نا سرحال آ اڈ ہلوک قومی کانفرنس آن تران کریکہ۔ اوپارے کہ اسلام اٹی دینی و دنیاوی علم انا نیام اٹ ہچ ءُ فرق اس اف، مسلم تہذیب نا عروج نا دور اٹی خاص وڑ اٹ اسپین اٹی مسلمان اہل علم سائنس، فلکیات و ریاضی تون اوار چندی بشخ آتیٹی نمان خذمت سرتسر، اسلامی تاریخ دا راستکی تا شاہد ءِ کہ علم، پٹ وپول وغوروفکر مسلم راج انا شونداری نا بنداوی تمبہ رہینگانے۔ پروفیسر احسن اقبال پارے کہ تاریخی بشخنگ و پوسکن آبادیاتی دور انا تعلیمی پالیسیک دینی و پوسکن تعلیم نا نیام اٹ مُری ودی کریر ہرادے چٹفنگ کن جوان و ہمہ گیر تعلیمی نظام اس جوڑ کننگ نا گرج ءِ ہرا اسلامی قدر، پوسکن سائنس، پٹ وپول و پوسکنوڑ ءِ یکجاکے۔ اولمہ ئی آ بولی ٹی تعلیم نا اہمیت آ زور شاغسا پارے کہ لمہ ئی آ بولی تخلیقی لائخی، تنقیدی سوچ و فکری نشوونما نا مونی دننگ اٹ اہم کڑد ادا کیک۔ بنجائی وزیرپارے کہ دینی مدرسہ غاک اسلامی علم و علمی میرات نا رکھ اٹی قابل قدر خذمت سرتننگ اٹی ءُ، ولے تعلیم نا مسخت بیرہ معلومداری نا فراوانی اف بلکن اخلاقی ہیلکاری راجی زمواری، علمی پٹ وپول و سائنسی جستجو ءِ مونی دننگ ہم ارے، قرآن کریم انسان ءِ غوروفکر، مشاہدہ و پٹ وپول نا سلہ خلیک ہرا فکری و قومی شونداری نا بنداوی اصول ءِ۔ کانفرنس اٹی جمعیت طلبہ عربیہ نا نمائندہ غاک مدرسہ غاتا فارغ التحصیل طالب علم آتے بڑزکو تعلیم اسکان رسینگ، تعلیمی سند آتا منظوری و کسبی بشخ آتیٹی وارخواہی تا بابت مون تروک ویل آتیا ہیت کریر۔

Get real time updates directly on you device, subscribe now.

Leave A Reply

Your email address will not be published.