چوری آ چنا تا ولشت عظیم ءُ انسانی و اخلاقی زمواری اسے،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی تون خضدار نا متحرک و ہمتی انگا راجی راہشون امینہ شفیع اوڑدہی کرے، ہرانا ٹی خضدار اٹی بے سیبو و چوری آ چناتا ولشت، تعلیم و گچین آخبت کن برجا راجی خذمت آتیا خیال آتا گپ وتران کننگا۔ امینہ شفیع تینا کمک نا رد اٹ دا چناتا کاٹم خواجہی و تعلیم نا زمواری تے سر تننگ اٹی ءِ و اوفتے راج انا شرفمند و وتواجہ ءُ شاری اس جوڑ کننگ کن عملی جہد کننگ اٹی ءِ۔ وزیراعلیٰ بلوچستان میر سرفراز بگٹی امینہ شفیع نا انسانیت نا جوزہ، حوصلہ و راجی خذمت آتاستاءِ کرسا پارے کہ راج اٹی اصل عظمت ایلوفتا ڈکھ و دڑد ءِ تینا سرپند مننگ و بے سیبو بندغ آتا سیبو جوڑ مننگ اٹی ءِ۔ امینہ شفیع کون آ ہمتی آ مسنک ننا راج انا نہادی ءُ مڈی ءُ ہرافک تینا عملی جہد آن انسانیت، ہمدردی و زمواری نا احساس نا روشنا درور جوڑ کننگ اٹی ءُ۔ وزیراعلیٰ پارے کہ چوری آ چناتا ولشت و تعلیم نا زمواری ءِ ہرفنگ بیرہ اسہ راجی خذمت اس آخا بلکہ بھلو انسانی و اخلاقی زمواری اس ءِ۔ اسہ چناءِ بیرہ وسیلہ تا کمتی نا سوب آن تعلیم و گچین آخبت نا وارخواہی تیاں محروم کننگپ‘ ریاست دن انگا درد مند و ہمتی آ بندغ آتا است بڈی ءِ کیک ہرافک راج انا محروم وضرورت مند تپہ غاتا گچینی کن عملی کڑد ادا کننگ اٹی ءُ۔ میر سرفراز بگٹی پارے کہ چناتا تعلیم، رکھ و گچین آخبت کن امینہ شفیع نا کوشست آتیٹی حکومت بلوچستان تینا کڑد ءِ ادا کیک و اونا فلاحی مشن نا ریسہ کن وس انا کچ آ کمکاری فراوان کننگک۔ او پارے کہ راج انا ازگار آ بندغ و واکدار آک بایدے چوری و بے سیبو چناتا تعلیم، ہیلکاری و ولشت کن مون آ بریر و اوفتا زند آتیٹی جوانی اتنگ کن تینا بشخ ءِ شاغر۔ وزیراعلیٰ بلوچستان پارے کہ اسہ چنا اسے نا زند اٹی اومیت نا گروشک ءِ روشنا کننگ اصل اٹ مچ آ راج انا آخبت ءِ روشنا کننگ نا بریبر ءِ۔ حکومت بلوچستان راج نا ہمو بندغ آتا است بڈی ءِ برجا تخک ہرافک تینا فائدہ غاتیان ایڑتر مرسا محروم و ضرورت مند چناتا زند آتیٹی مثبت بدلی اتنگ کن کوشست کننگ اٹی ءُ۔