علامہ اقبال نا فکر اینو ہم مچ آ قوم، ورنا تے کن راہشونی نا سوب ءِ،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی شاعر مشرق، مفکر پاکستان ڈاکٹر علامہ محمد اقبالؒ نا ودی دے آ اودے خراجِ عقیدت پیش کرسا پارینے کہ علامہ اقبال نا فکر، فلسفہء خودی، تینے آ پت و عمل نا کلہو اینو ہم مچ آ قوم خاص وڑ اٹ ورنا چین اکن کسر نا ڈیوا ءِ۔ تینا خصوصی کلہو اٹی وزیراعلیٰ پارے کہ علامہ اقبال تینا شاعری و فکر نا کمک اٹ برصغیر نا مسلمان تے ٹی آجوئی، خودداری، سیوت و قومی پجار نا شعور بیدار کرے۔ اونا فکر آک اسہ آجو ءُ وطن اسے نا تصور ءِ فکری بنداو فراوان کریر و مسلمان آتے تینا جتا ءُ پجار، ربیدگی و اجتماعی آخبت نا رد اٹ پوسکن ءُ کسر اس نشان تسر۔ میر سرفراز بگٹی پارے کہ علامہ اقبال نا فلسفہ خودی بیرہ فکری تصور اس آخا بلکہ تینا لائخی تے درستی راستی کننگ، تینے آ پت ودی کننگ، پدریسہ جہد و بڑزکو مسخت تا دوئی کننگ نا عملی سبخ ءِ۔ اونا کلہو ننے نااومیتی آن پیش تمسا اومیت، خواری و کڑدار نا سوگوی تون مونی ہننگ نا پاہک‘ وزیراعلیٰ پارے کہ اینو پاکستان ءِ مون تروک چیلنج آتتون مون تننگ‘ قومی سیوت ءِ سوگو کننگ و شونداری و شونہالی نا مزل دوئی کننگ کن علامہ اقبال نا فکر تیان راہشونی دوئی کننگ نا گرج ءِ۔ خاص وڑ اٹ ورنا چین ءِ اقبال نا کلہو علم، جاست پاست، کردار سازی و خود انحصاری تون درستی راستی کرفنگ وخت انا اہم ءُ گرج اسےِ۔ میر سرفراز بگٹی پارے کہ بلوچستان نا ورنا تیٹی بے کچ لائخی ساڑی ءِ، اوفتے آب اٹو تعلیم، پوسکنوڑ علم و اسہ وڑ انا وارخواہی فراوان کرسا ملک و صوبہ نا شونداری ٹی گچین کڑد ادا کننگ نا وڑ جوڑ کننگ انگ ءِ۔ علامہ اقبال نا کلہو ننے پت، سیوت و پدریسہ جہد انا کمک اٹ اسہ سوگو، وتواجہ و شونہال ءُ پاکستان اسے نا تفنگ نا کسر نشان ایتک۔