ریاض و سویلی علاقہ غاتا کنڈ آ خسنگوک 2 کروز میزائل بھس کرینن،سعودی عرب

اسلام آباد / ریاض، سعودی عرب نا کماشی ٹی یمن اٹی حوثی باغی تا برخلاف متحرک عسکری سیوتی فوج دارالحکومت ریاض و مملکت نا سویلی علاقہ غاتا کنڈ آ خسنگوک 2 کروز میزائل بھس کننگ نا پڑو ءِ کرینے۔ عسکری سیوت نا رِد اٹ تدوک آ 24 گھنٹہ ٹی دا ارٹمیکو میزائل جلہو ئس ہرا بے سہب کننگا۔ داڑان مست سیوت ریاض نا کنڈ آ خسنگوک 2 بیلسٹک میزائل ءِہم خلا اٹی بھس کننگ نا دعویٰ کریسس، ہرانا پد اٹی سعودی دارالحکومت اٹی ترند دھماکہ تا توار بسوسس۔ درملکی خبررساں ادارہ نا رِد اٹ دھماکہ تیاں مچٹ مست سعودی سول ڈیفنس ریاض نا علاقہ ٹی ہلہلہ ئی ڈہ جاری کریسس، ولے اوکان پد کمامدار آک پڑو کریر کہ خطرہ نا حالیت چٹانے۔ دا میزائل جلہوک ہمو وخت آ مون آ بسنو ہراڑان اسہ دے مست حوثی تا کنٹرول اٹ یمن نا وزارت جانجوڑی دعویٰ کریسس کہ سعودی بالی جلہو آتیٹی کم آن کم 33 بندغ زوال و 39 ٹھپی مسر۔ حوثی تا سرکاری خبر رساں ادارہ ’صبا‘ نا رِد اٹ بالی جلہو آتیٹی دارالحکومت صنعا نا دے ٹِک اٹی ساڑی حوثی تا سوگو گڑھ بنی حشیش نا اسہ خلق اسے ٹی اُرا تے شست کننگا۔ ادارہ دعویٰ کرے کہ زوال مروک آتیٹی زیات تر زالبول و چناک اوار ءُ۔ صنعا نا صحتونہ ہسپتال نا ڈائریکٹر عبدالعزیز الدیلمی رائٹرز ءِ معلومدار کرے کہ کیہی زہمیک داسکان ہم ڈیمبری تا کیرغ اٹ گٹ ءُ، ہرافتی ٹی کمکی کارندہ غاک ہم اوار ءُ۔ او پارے کہ کمکی سرجز آتا وخت آتا ہم جلہو آک برجا ئسر و طبی کارندہ غاتا منہ باسک ہم زوال مسر۔ ٹھپی تے کاٹم، سینی و نت تیا ٹھپ و ہڈ آتا پننگ ناسوب آن خراب حالیت آتے ٹی ہسپتال آ گدریفنگا۔