علامہ اقبالؒ تینا فکری شاعری نا کمک اٹ امت مسلمہ ءِ بیدار کرے،نسیم الرحمان خان

کوئٹہ، صوبائی سلاہکار برائے چاگڑد و موسمیاتی تبدیلی نسیم الرحمن خان ملاخیل 9 نومبر، یومِ اقبال نا وخت آ تینا کلہو اٹی پارینے کہ مفکرِ اسلام، شاعرِ مشرق علامہ محمد اقبال نا 149می ودی دے انا وخت آ نن مچ آ قوم ءِ مبارکبادی پیش کینہ۔ 9 نومبر نا دے بیرہ اسہ بھلو شخصیت اسے نا ودی مننگ نا یاتگار آخا بلکہ دا فکری بیداری و خودی نا احیاء نا دے ءِ۔ او پارے کہ علامہ اقبالؒ تینا فکر و بڑزکو شاعری نا کمک اٹ امت مسلمہ ءِ غفلت نا تغ آن بیدار کرے۔ اونا فلسفہ خودی انسانی وقار، عزتِ نفس و پدریسہ جہد انا سبخ ایتک۔ او دو قومی نظریہ نا بنداو ءِ تخسا برصغیر نا مسلمان آتیکن اسہ جتاءُ وطن اسے نا تغ ءِ خنا، ہرادے قائد اعظم محمد علی جناحؒ نا کماشی ٹی حقی دروشم رسینگا۔ صوبائی سلاہکار پارے کہ اینو پاکستان ءِ مون تروک چیلنج آتتون مون تننگ کن فکرِ اقبال آ عمل کننگ وخت نا اہم انگا گرج ءِ۔ اقبالؒ ورنا تے ”شاہین“ نا پن تس و اوفتیان بڑزکو بال، خودداری و مثبت فکر نا اومیت تخا۔ اینو نا پوسکن آ چین ءِ اقبال نا شاہین نا کڑد ادا کرسا ملک و ملت نا شونداری، سیوت و سوگوی کن عملی پڑ آ مونی بروئی تمک۔ دا یومِ اقبال آ نن دا ارادگی ءِ کینہ کہ نن بدبیسئی، فرقہ واریت و نااومیتی ءِ چٹفسا علامہ اقبالؒ نا نشان تروک اصول سیوت، تنظیم و خودی نا کلہو ءِ لس کیک تاکہ پاکستان ءِ اسہ سوگو، باوقار و پرامن ءُ ریاست اس جوڑ کننگ مرے۔