جانجوڑی نا بشخ اٹی زرکاری نا بنداوی مسخت الس ءِ ریلیف فراوان کننگ ءِ،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹی است انا ناجوڑی تا درمان کن پوسکنوڑ طبی آسراتی تا فراوانی نا کنڈ آ اسہ اہم ءُ پیشرفت اسے نا وڑ اٹ بلوچستان انسٹیٹیوٹ آف کارڈیو ویسکیولر ڈیزیز (BICVD) نا پوروی گڈیکو ریسہ ٹی ءِ و 150 بیڈ آ تالان دا پوسکنوڑ ہسپتال نا بنا ہندا تُو اٹ مریک۔ او پارے کہ دا ادارہ نا جوڑ مننگ آن بلوچستان نا الس ءِ است انا ناجوڑی تا تشخیص و درمان نا پوسکنوڑ آسراتیک صوبہ ٹی دوئی مریرہ و ناجوڑ آتے درمان کن ایلو صوبہ غاتیا سفر کننگ نا خواری تیاں خلاسی رسینگک۔ دا خیال آتا درشانی ءِ او بلوچستان انسٹیٹیوٹ آف کارڈیو ویسکیولر ڈیزیز نا بورڈ آف ڈائریکٹرز نا اولیکو دیوان نا کماشی ءِ کرسا کرے۔ دیوان اٹی ہسپتال نا پوروی، طبی آسراتی تا فراوانی، انتظامی پنجر و ادارہ ءِ فعال کننگ تون تعلقدار داسکان مروک آ پیشرفت نا جم جاچ ءِ ہلنگا۔ دیوان اٹی پنی آ ماہر امراضِ قلب ڈاکٹر جلال خان ءِ بلوچستان انسٹیٹیوٹ آف کارڈیو ویسکیولر ڈیزیز نا عبوری سروک تعینات کننگ نا منظوری تننگا، ڈاکٹر جلال خان ادارہ ءِ پوسکنوڑ طبی خواست آتا رِد اٹ فعال جوڑ کننگ نا عمل نا چاروکی ءِ کیک‘ دیوان ءِ بریفنگ ترسا پاننگا کہ ہسپتال نا بنائی ریسہ ٹی اوڑتون گنڈوک مسہ سیٹلائٹ ہند ہم فعال کننگک تاکہ ناجوڑ آتے بنداوی کہول آ طبی آسراتی تا فراوانی و وخت آ تشخیص پک مننگ کے‘ صوبائی جانجوڑی وزیر بخت محمد کاکڑ دیوان ءِ معلومدار کرے کہ ارٹمیکو ریسہ ٹی سیٹلائٹ ہند آتا کاریمی دنگ ءِ کل ڈویژنل ہیڈ کوارٹر تسکان ودفنگک وخت اس کہ صوبہ نا کل ضلع غاتیٹی چیسٹ پین مینجمنٹ سینٹر ہم جوڑ کننگک تاکہ سینہ ٹی تکلیف و است انا ناجوڑی تا علامت آتا پاش مننگ نا حالیت اٹی ناجوڑ آتے دمدستی طبی کمک و وخت آ تشخیص نا آسراتی فراوان کننگ مرے۔ وزیراعلیٰ میر سرفراز بگٹی پارے کہ جانجوڑی نا بشخ اٹی پوسکنوڑ طبی ادارہ غاتا جوڑ کننگ و الس ءِ آب اٹو درمان نا آسراتی تااوفتا درگہ غا فراوان کننگ صوبائی حکومت نا اہم گام گیج آتا بشخ ءِ۔ او پارے کہ بلوچستان انسٹیٹیوٹ آف کارڈیو ویسکیولر ڈیزیز ءِ پوسکنوڑ طبی ازباب، مستند چاہندار و گچین انتظامی نظام نا کمک اٹ فعال جوڑ کننگک تاکہ است انا ناجوڑی تا ناجوڑ آتے وخت آ تشخیص، آب اٹو درمان و ہلہلہ ئی طبی آسراتی تا فراوانی پک کننگ مرے۔ وزیراعلیٰ پارے کہ جانجوڑی نا بشخ اٹی زرکاری نا بنداوی مسخت الس ءِ ریلیف فراوان کننگ و درمان کن مون تروک مشکل آتا چٹفنگ ءِ۔ او پیدوار کرے کہ طبی آسراتی تا فراوانی ٹی بیرہ کوئٹہ آخا بلکہ سیٹلائٹ ہند آتا کمک اٹ بلوچستان نا مُر انگا ضلع غاتیٹی ہم پک کننگک تاکہ صوبہ نا ہر شاری ءِ است انا ناجوڑی تا گچین طبی آسراتی تیا رسینگ گیگ دوئی مرے۔ دیوان اٹی صوبائی جانجوڑی وزیر بخت محمد کاکڑ، بورڈ انا باسک ڈاکٹر ربابہ خان بلیدی، ڈاکٹر محمد نواز، چیف سیکرٹری بلوچستان شکیل قادر خان، سیکرٹری جانجوڑی مجیب الرحمن پانیزئی و پوسکن تعینات مروک عبوری سروک ڈاکٹر جلال خان ویڈیو لنک انا کمک اٹ بشخ ہلکر۔ وخت اس کہ ایڈیشنل چیف سیکرٹری شونداری وڈٹ بندی زاہد سلیم، پرنسپل سیکرٹری وزیراعلیٰ عمران زرکون، ایڈیشنل سیکرٹری چیف منسٹر سیکرٹریٹ محمد فریدون خان، اسپیشل سیکرٹری محکمہ جانجوڑی شہک بلوچ، اسپیشل سیکرٹری خزانہ محمد عارف خان و ایلو تعلقدار کمامدار آک ہم دیوان اٹی بشخ ہلکر۔