آٹو پالیسی نا منظوری، برآمد آتیا اولیکو سال مالیت نا 5 درسد ریوارڈ تننگک، عطاء اللہ تارڑ

اسلام آباد، حکومت پوسکن آ آٹو پالیسی نا منظوری تننگ نا پڑو کرینے و وزیر حوالکاری وشینکاری عطاء اللہ تارڑ پارینے کہ پوسکن آ آٹو پالیسی آن چاگڑدی کچٹی آن خلاسی رسینگک و درآمدی پٹرولیم اٹی نمان کمتی مریک‘ پوسکن آ پالیسی ٹی الیکٹرک گاڈی تا بھاز است بڈی کننگانے، چارجنگ اسٹیشن خلنگ آ ہم کسٹم ڈیوٹی اف، سیلز ٹیکس ءِ ہم کم کننگانے۔ وزیراعظم نا سلاہکار ہارون اختر خان پارے کہ پالیسی نا سوب آن داسہ گاڈی تا نہاد آتیٹی کمتی بریک، مڈل و اپر کلاس کن گاڈی تا نہاد آتیٹی پدریسہ شیفی بننگ نا گمان ءِ، پوسکن آ آٹو پالیسی ٹی گاڈی تا برآمد آتے اولیت گوندنگانے‘ آٹو سیکٹر اٹی برآمد آتے 20 کروڑ ڈالر آن ودفسا 6 ارب ڈالر آ دننگک‘ برآمد آ اولیکو سال مالیت نا 5 درسد ریوارڈ تننگک۔ اسیجا پریس کانفرنس آن تران کرسا وزیر حوالکاری عطاء اللہ تارڑ پارے کہ پوسکن آ آٹو پالیسی نا بھاز بے صبری اٹ انتظار کننگاکہ مستین نا کیہی دہائی تیاں گاڈی تیا زیات درآمدی ڈیوٹی آن پد ہم ہندی انڈسٹری ٹی تیار مروک گاڈی تیٹی پوسکن آ آسراتی تا تنکی مس‘ کل آسراتی تیان پد ہم ہندی کار ساز انڈسٹری صارف آتے گچین گاڈیک تننگ کتو۔ وزیر حوالکاری پارے کہ وزیراعظم نا پارت ءِ کہ نیامی تپہ کن گاڈی تا صنعت اٹی آسراتی ودی کننگے، پوسکن آ آٹو پالیسی آن چاگڑدی کچٹی آن خلاسی رسینگک‘ پوسکن آ آٹو پالیسی آن درآمدی پٹرولیم اٹی نمان کمتی مریک‘ الیکٹرک گاڈی تیان چاگڑد اٹ کاربن کم مریک و چاگڑد ءِ فائدہ رسینگک‘ چاگڑد، درآمدی بل و زرگزران نا بابت دا پالیسی بھاز جوان ءِ۔ عطاء تارڑ پارے کہ چارجنگ اسٹیشن خلنگ آ ہم کسٹم ڈیوٹی اف، سیلز ٹیکس ءِ ہم کم کننگانے، پوسکن آ پالیسی ٹی الیکٹرک گاڈی تا بھاز است بڈی کننگانے، پوسکن آ پالیسی ٹی 1000 سی سی اسکان پٹرول آ چلینگbuilder گاڈی تیٹی ہچ ءُ ردول بدلی اس کننگتنے۔ دا وخت آ ہارون اختر خان پارے کہ بھاز سلابت آن پد آٹو پالیسی نا منظوری تننگا، بھلا صنعت آتا شونداری حکومت نا اولیت ءِ، 10 سال آن پالیسی جوڑ کننگ ئسن ولے ایکسپورٹ ودتو، برآمد آ تالان پالیسی نا تیاری ٹی بھاز خواری کننگانے، الیکٹرک وہیکلز نا شون تننگ آ خصوصی چکار کننگ انگ ءِ۔ ہارون اختر پارے کہ ڈیہہ اٹی چک و تاڑ آن پد الیکٹرک وہیکلز نا اہمیت اٹی ودکی مسنے، پالیسی نا سوب آن داسہ گاڈی تا نہاد آتیٹی کمتی بریک، مڈل و اپر کلاس کن گاڈی تا نہاد آتیٹی پدریسہ شیفی بننگ نا گمان ءِ، پوسکن آ آٹو پالیسی ٹی گاڈی تا برآمد آتے اولیت گوندنگانے۔