سائبر کرائم ایم او یو آ دستخط نا فیصلہ،پاکستان، سوڈان نا پولیس ٹریننگ و ایلو بشخ آتیٹی کمکاری ودفنگ آ امنا

اسلام آباد، پاکستان و سوڈان تین پہ تینی تعلقداری تے پوسکن آ بُڑزی تسکان رسیفنگ و سیکورٹی، داخلی باندات‘ سائبر کرائم، پولیس ٹریننگ، ادارہ ئی کمکاری و شاری رجسٹریشن اوار چند بشخ آتیٹی اواری ءِ ودفنگ آ امنا کرینو۔ ہڑتوم آ ملک آتا نیام اٹ سائبر کرائم نا بشخ اٹی کمکاری نا شون تننگ کن مفاہمتی یادداشت آ دستخط کننگ نا ہم فیصلہ کننگانے۔ دا ارادگی نا درشانی ءِ سوڈان نا وزیر داخلہ لیفٹیننٹ جنرل بابکر سمرہ مصطفی علی و بنجائی وزیر داخلہ محسن نقوی نا نیام اٹ اوڑدہی و ڈل آتا کہول آ مذاکرات نا وخت آ کننگا۔ اوڑدہی ٹی وزیر مملکت داخلہ طلال چوہدری ہم ساڑی ئس۔ مذاکرات آتیٹی ہڑتوم آ ملک آتا نیام اٹ سیکورٹی کمکاری، داخلی سلامتی، سائبر کرائم نا توننگ‘ پولیس افسر آتا ہیلکاری، نادرا نا آزموندہ غاتیان فائدہ ہرفنگ و ادارہ ئی رابطہ غاتے پین سوگو جوڑ کننگ نا باندات آ جم گپ وتران کننگا۔ دا وخت آ سوڈان نا وزیر داخلہ پارے کہ سوڈان سائبر کرائم نا بشخ اٹی پاکستان نا چاہنداری و آزموندہ غان فائدہ ہرفنگ خوانہ۔ پاکستان ننا ایلم ملک ءِ و نن اوڑتون کل بشخ آتیٹی کمکاری ءِ بھاز اہمیت ایتنہ۔ او پارے کہ سوڈان پاکستان تون چندی بشخ آتیٹی کمکاری ءِ پین ودفنگ نا خواہندار ءِ۔ او پاکستان نا کنڈ آن کمکاری نا سلہ غا منتواری نا درشانی ءِ ہم کرے۔ بنجائی وزیر داخلہ محسن نقوی پارے کہ پاکستان سوڈان اٹی امن و اول سر تفنگ نا عمل اٹی ہر وڑ انا کمکاری فراوان کننگ کن تیار ءِ۔ پاکستان سوڈانی پولیس افسر آتے کسبی ہیلکاری فراوان کننگ کن ہم تیار ءِ تاکہ ہڑتوم آ ملک آتا نیام اٹ سیکورٹی و ادارہ ئی کمکاری ءِ پین سوگو جوڑ کننگ مرے۔ محسن نقوی سوڈان اٹی نادرا نا خذمت آتا ذکر ءِ کرسا معلومدار کرے کہ نادرا نا کمک اٹ سوڈان اٹی 3 کروڑ 60 لکھ شہریت کارڈ، 90 لکھ قومی شناختی کارڈ، 1 کروڑ 80 لکھ ودی سرٹیفکیٹ و 5 لکھ ڈیتھ سرٹیفکیٹ جاری کننگانے۔ او پارے کہ سول رجسٹریشن نا نظام ءِ پین گچین جوڑ کننگ کن نادرا آخبت اٹی ہم سوڈان تون کمکاری کن مدام سنبرینگوک ءِ۔