یوکرین آ روس انا میزائل و ڈرون جلہو، 9 بندغ ٹھپی

کیف، روس و یوکرین نا نیام اٹی برجا جنگ اٹی اسہ وار ولدا ترندی بسنے۔ روسی فوج آک شنبے نا سہب سہاری یوکرین نا بنجائی شار کیف و اونا ایب کیب انا علاقہ غاتیٹی میزائل و ڈرون تا کمک اٹ بھلا کہول آ جلہو کریر، ہرافتا نتیجہ ٹی 9 بندغ ٹھپی مسر، وخت اس کہ کیہی ہنکینی ماڑی واپاری ہند و توانائی نا بنداوی پنجر ءِ نسخان رسینگا۔ یوکرینی کمامدار آتا رِد اٹ روس انا کنڈ آن کروک آ جلہو آتیٹی بیلسٹک میزائل و بے پائلٹ بالی جہاز کاریم اٹ اتننگا۔ یوکرین نا صدر ولودیمیر زیلنسکی معلومدار کرے کہ روس جلہو تا وخت آ 36 بیلسٹک میزائل و 172 ڈرون کاریم اٹ ایس‘ جلہو تا سوب آن منہ علاقہ غاتیٹی بجلی، دیر و باسنی نا فراوانی زہمی مس، وخت اس کہ رکھی گام گیج آتا رد اٹ کیف نا نارتھ برج ءِ ہم بند کروئی تما۔ کیف انا میئر وٹالی کلِچکو نا رِد اٹ میزائل جلہو آتا نتیجہ ٹی ہنکینی علاقہ غاتے نسخان مس و شاری تا ہڑدے ئی زند زہمی مس۔ کمامدار آک شاری تے پارت کرینو کہ او بالی جلہو آتا خطرہ غاتے مون آ تخسا رکھوک ہند و باہوٹ جاہ ٹی مریر۔