سی پیک نا اولیکو ریسہ ڈغار تے گنڈا، بروک آ ریسہ است آتے گنڈک،بنجائی حوالکاری وزیر عطاء اللہ تارڑ

اسلام آباد، بنجائی وزیر حوالکاری و شینکاری عطاء اللہ تارڑ پارینے کہ چین پاکستان انفارمیشن کوریڈور ہڑتوم آ ملک آتا نیام اٹی متکن آ سنگتی‘ تین پہ تینی پت و اسیجائی آخبت نا وژن ءِ ڈیجیٹل دور اٹی پوسکن ءُ رخ اس تس۔ او پارے کہ چین پاکستان اقتصادی راہداری (سی پیک) ہڑتوم آ ملک آتا زرگزران و بنداوی پنجر ءِ گنڈا، وخت اس کہ انفارمیشن کوریڈور الس، میڈیا، واپاری ادارہ و ورنا چین نا نیام اٹی رابطہ غاتے سوگو کننگ اٹی پول انا کڑد ادا کیک۔ چین پاکستان انفارمیشن کوریڈور نا بنائی دود آن تران کرسا بنجائی وزیر حوالکاری پارے کہ پاکستان و چین نا تعلقداریک بیرہ جغرافیائی خڑکی اسکان کچ اٹ افس بلکہ اسیجائی تاریخ، ربیدہ، روایات و تین پہ تینی پت اتون گنڈوک ءُ۔ او پارے کہ ہڑتوم آ ملک آتا سنگتی پشت در پشت گدرینگوک ہندن ءُ میراث اسے ہرادے پوسکن آ چین اسکان رسیفنگ وخت نا اہم ءُ گرج اسے۔ عطاء اللہ تارڑ پارے کہ پاک چین سنگتی نا داستان درہ خنجراب آن گوادر، کراچی و ملک انا ایلو بشخ آتسکان تالان ءِ۔ ہڑتوم آ ملک آک اواری اٹ قراقرم ہائی وے ءِ تَفیر و دا سفر اٹی بھاز آ بندغ آک قربانی تسر۔ داسہ چین پاکستان انفارمیشن کوریڈور نا کمک اٹ رابطہ غاتا اسہ پوسکن ءُ شاہراہ اس تفنگ انگ ءِ، ہرا معلومداری، راستکی و تین پہ تینی افہام و تفہیم نا کمک اٹ ہڑتوم آ قوم تے خڑک کیک‘ او پارے کہ صدر شی جن پنگ نا 2015ء نا دورہ پاکستان و سی پیک نا بنا پاک چین اقتصادی کمکاری ءِ پوسکن آ بڑزی تسکان سر کرے۔ اونا رِد اٹ سی پیک، بیلٹ اینڈ روڈ انیشی ایٹو نا اہم ءُ ڈٹ اسے، ہرانا کمک اٹ توانائی، موٹرویز و بنداوی پنجر نا بشخ آتیٹی نمان پیشرفت مس۔ او پارے کہ سی پیک نا اولیکو ریسہ ہڑتوم آ ملک آتا ڈغار تے گنڈا، وخت اس کہ بروک آ ریسہ الس نا نیام اٹی رابطہ، پوسکنوڑ‘ روزگار و شونداری نا پوسکن آ وارخواہی تے ودی کننگ آ چکار کیک‘ او پارے کہ سی پیک 2.0 نا رد اٹ وزیراعظم شہباز شریف و چینی صدر شی جن پنگ شونداری، روزگار، پوسکنوڑ‘ چاگڑد دوست شونداری و کشادگی آ تالان کمکاری ءِ مونی دننگ نا ارادگی نا درشانی ءِ کرینو۔ او پارے کہ اگہ سی پیک اسیجائی آخبت نا (جسم ءِ تو چین پاکستان انفارمیشن کوریڈور اونا توار مریک۔ اقتصادی راہداری ہڑتوم آ ملک آتا زرگزران ءِ گنڈک، وخت اس کہ انفارمیشن کوریڈور تین پہ تین نا پُہہ مننگ‘ پت و السی رابطہ غاتے سوگو کیک۔ عطاء اللہ تارڑ پیدوار کرے کہ چین پاکستان انفارمیشن کوریڈور چار بنداوی تمبہ غاتیا جوڑ ءِ، ہرافتے ٹی میڈیا، واپار، تھنک ٹینکس و ربیدہ، سیل سوات و ورنا تا رابطہ غاک اوار ءُ۔ او پارے کہ دا کل بشخ آتیٹی کمکاری ءِ عملی دروشم تننگ کن گام گیج آک بنا کننگانو۔ بنجائی وزیر پارے کہ انفارمیشن کوریڈور نا اولیکو تمبہ میڈیا ءِ، ہرانا رد اٹ پاکستان و چین نا 18 میڈیا ادارہ غاتیا تالان نیوز ایکسچینج ورکنگ گروپ جوڑ ءِ۔