جام کمال خان نا دوحہ ٹی اہم اوڑدہی تا حوال،پاکستان و قطر نا نیام اٹ واپار و زرکاری ءِ ودفنگ نا بابت باندات آتیا امنا

دوحہ، پاکستان و قطر نا نیام اٹی واپاری و اقتصادی تعلقداری تے پین ودفنگ‘ درملکی زرکاری ءِ ودفنگ و پاکستانی برآمد آتیکن پوسکن آ جہانی منڈی تسکان رسینگ گیگ نا وارخواہی تے ودی کننگ کن بنجائی وزیر واپار جام کمال خان نا دوحہ ٹی بڑزکو کہولی اوڑدہی تا ریسہ برجا ءِ۔ دا اوڑدہی تیٹی ڈی ایٹ ملک آتا نیام اٹی واپاری کمکاری، کشاری بشخ اٹی شریداری‘ صنعتی زرکاری، علاقائی واپاری راہداری و سیل وسوات نا بشخ آتیٹی اسیجائی ڈٹ آتیا گپ وتران کننگا۔ بنجائی وزیر واپار جتا قطری کمامدار، واپاری شخصیت و زرکار آتتون اوڑدہی تا وخت آ پاکستان اٹی زرکاری نا وارخواہی تے پیدوار کرسا اوفتے خصوصی اقتصادی زون، صنعتی علاقہ، کشت وکشار‘ غذائی رکھ‘ ہوٹل انڈسٹری و سیل سوات نا بشخ آتیٹی زرکاری نا سلہ خلک‘ دا اوڑدہی تا بنداوی مسخت ہڑتوم آ کنڈآن اقتصادی رابطہ غاتے عملی واپاری و زرکاری ڈٹ آتیٹی بدل کننگ ءِ۔ بنجائی وزیر واپار جام کمال خان ڈی ایٹ تنظیم نا سیکرٹری جنرل تون اوڑدہی کرے، ہراٹی باسک ملک آتا نیام اٹی واپار ءِ ودفنگ، اقتصادی رابطہ غاتے سوگو کننگ و تین پہ تینی واپاری اڑاند آتے کم کننگ نا وارخواہی تیا جم گپ وتران کننگا۔ اوڑدہی ٹی ڈی ایٹ ملک آتا تین پہ تینی واپار ءِ 2030ء اسکان 500 ارب ڈالر اسکان رسیفنگ نا ہدف و ڈی ایٹ اولیتی واپاری معاہدہ غا گچین عملدرآمد نا گرج آ زور شاغنگا۔ جام کمال خان پارے کہ باسک ملک آتا نیام اٹی پوسکن آ منڈی تسکان رسینگ گیگ ءِ گچین جوڑ کننگ، پرائیویٹ بشخ انا شریداری ءِ ودفنگ و دوئی واپاری وارخواہی تیان فائدہ ہرفنگ نا گرج ءِ۔ اوڑدہی ٹی اقتصادی کمکاری ءِ شون تننگ و کاروباری رابطہ غاتے سوگو کننگ آ امنا کننگا، وخت اس کہ ڈی ایٹ سیکرٹری جنرل دا رد اٹ پاکستان نا کڑد انا ستاءِ کرے۔ بنجائی وزیر واپار قطر نا وزیر بلدیات تون ہم اوڑدہی کرے، ہراٹی پاکستان و قطر نا نیام اٹی کشت وکشار‘ غذائی رکھ و واپاری کمکاری ءِ ودفنگ نا وارخواہی تا جاچ ءِ ہلنگا۔ اوڑدہی ٹی کشاری بشخ اٹی اسیجائی کاروباری وارخواہی تے پٹنگ، کشاری سپلائی چین ءِ گچین جوڑ کننگ و غذائی رکھ اکن تین پہ تینی رابطہ غاتے ودفنگ آ گپ و تران مس۔