27 اکتوبر کشمیری الس کن تہار ءُ دے اسے، اوفتتون سلوک اُن،وزیر اعلیٰ میر سرفراز بگٹی

کوئٹہ، وزیر اعلیٰ بلوچستان میر سرفراز بگٹی پارینے کہ 27 اکتوبر کشمیری الس کن تہار ءُ دے اسے۔ او تہاردے انا وخت آ تینا کلہو اٹی پارے کہ دادے بھارتی فوج کشمیر اٹ پترینگسا کانود آن چَپ کوزہ نا بنداو ءِ تخا۔ پاکستان نا الس، خاص وڑ اٹ بلوچستان نا الس و حکومت کشمیری ایلم و ایڑھ تتون سلوک ءِ و اوفتا حق خودارادیت نا مخ تفی ءِ کیک۔ او پارے کہ پاکستان کشمیری الس ءِ تینا ایلم و کشمیر ءِ تینا شہ رگ تکک۔ اقوام متحدہ نا تعلقدار قرارداد آتا رداٹ کشمیر نا ویل انا انصاف اٹ ایسر و کشمیری الس ءِ تینا آخبت نا فیصلہ ءِ کننگ نا حق بایدے رسینگے۔ او پارے کہ بھارت نا غیر کانودی کوزہ ٹی جموں و کشمیر اٹ بھارتی فوج آتا دوتے اٹ انسانی حق آتا خلاف ورزی، کودک شاری تا خون و زالبول آتیا بیدادی بھاز گڑتی ناسوب ءِ‘ او پارے کہ کشمیر اٹ بھارتی فوج انا بھلو کچ اسے ٹی ساڑی مننگ داہیت انا درشانی ءِ کیک کہ کشمیری الس آجوئی و حقِ خودارادیت نا دوئی کننگ کن تینا جہد ءِ برجاتخانو۔۔ وزیراعلیٰ بلوچستان پارے کہ بلوچستان نا الس و صوبائی حکومت تینا کشمیری ایلم تتون پورو یکجہتی نا درشانی ءِ کیک۔ کشمیری الس نا قربانی اوفتا آجوئی نا است خواہی و تینا بنداوی حق آتا دوئی کننگ نا عزم انا ڈیک ءِ۔ او دا اردگی نا درشانی ءِ کرے کہ پاکستان کشمیری الس نا سیاسی، اخلاقی و سفارتی مخ تفی ءِ برجاتخک۔ او اومیت درشان کرے کہ کشمیری الس ءِ اقوام متحدہ نا قرارداد آتا رداٹ و اوفتا است خواہی تا رداٹ حقِ خودارادیت دوئی مریک وکشمیر نا ویل انا انصاف اٹ ایسری ءِ پک جوڑ کننگک۔