کشمیر تا جہد ءِ زور انا زی آ شیف شاغنگ مفک، کچھی ضلعی انتظامیہ

ڈھاڈر، 27 اکتوبر تہار دے کشمیر نا وخت آ ضلعی انتظامیہ کچھی نا کنڈآن کشمیری الس تون یکجہتی کن ڈپٹی کمشنر کچھی آفس اٹی شاندار ریلی اس اڈ تننگا‘ ریلی نا کماشی ءِ ایڈیشنل ڈپٹی کمشنر خان محمد دیناری کرے‘ ریلی ٹی انتظامی، پولیس و سول افسر آتتون اوار شاری تا بھلو کچ اس بشخ ہلک۔ ریلی نا شریدار آک کشمیری و پاکستانی بیرک ہرفسا کشمیری الس تون یکجہتی کن نعرہ خلکر۔ دا وخت آ شریدار آتیان تران کرسا ایڈیشنل ڈپٹی کمشنر کچھی خان محمد دیناری پارے کہ 27 اکتوبر 1947ء کشمیری الس نا تاریخ نا اسہ تہار ءُ دے اسےِ ہراتم بھارتی فوج مقبوضہ جموں و کشمیر اٹی پترینگا، ہمو دے آن کشمیری الس بھارتی کوزہ نا برخلاف تینا آجوئی‘ بنداوی حق و حقِ خودارادیت نا دوئی کننگ کن پدریسہ جہد کننگ اٹی ءِ۔ او پارے کہ مقبوضہ کشمیر اٹی انسانی حقوق آتا خلاف ورزی، ظلم و بیدادی و السی آجوئی تیا رکھ آتا چٹفنگ وخت نا اہم ءُ گرج اسے۔ جہانی برادری و اقوامِ متحدہ کشمیری الس تون کروک قول تا رد اٹ مسئلہ کشمیر نا انصاف اٹ ایسر و اقوامِ متحدہ نا قرارداد آتیا عملدرآمد کن تینا کڑد ءِ ادا کیر۔ (سمیع اللہ جلبانی بلوچ)