جہانی برادری کشمیر ویل انا ایسری کن گام گیج کے، سردار کھیتران

کوئٹہ، مسکوہی صوبائی وزیر سردار عبدالرحمن کھیتران کشمیر نا تہار دے انا وخت آ تینا کلہو اٹ پارینے کہ کشمیری الس نا حقِ خود ارادیت کن جہد اوفتا بنداوی حق و آجو آخبت نا است خواہی تا ڈیک ءِ۔ کشمیر نا ویل انا انصاف اٹ ایسر ی ءِ اقوام متحدہ نا قرارداد و کشمیری الس نا است خواہی تا رداٹ بایدے کشنگے۔ او پارے کہ مقبوضہ کشمیر اٹ انسانی حق آتا حالیت و شاری تے مون تروک مشکل جہانی چکار نا خواست ءِ کیرہ۔ جہانی برادری بایدے کشمیری الس نا بنداوی حق آتا رکھ و ویل انا پرامن ایسری کن گچین گام گیج کے۔ سردار عبدالرحمن کھیتران پارے کہ کشمیر نا ویل انا ایسری کن جہانی کہول آ سنجیدہ کوشست و گچین سفارتی گام گیج المی ءِ تانکہ ڈیہہ اٹی امن و سوگوی ءِ مونی دننگ مرے و کشمیری الس ءِ تینا آخبت ءِ پک کننگ نا حق دوئی مرے۔ او مستی پارے کہ پاکستان کشمیری الس نا سیاسی، اخلاقی و سفارتی مخ تفی ءِ برجا تخک۔ کشمیری الس نا است خواہی تا شرف و اوفتا بنداوی حق آتا پاسداری کشمیر نا ویل انا انصاف اٹ ایسری نا کنڈ آ اہم ءُ پیشرفت اس جوڑ مننگ کیک۔