کشمیری الس تینا بنداوی حق آتے کن کیہی دہائی تیان جہد کننگ اٹی ءِ،میجر(ر)الیاس کبزئی

سیوی، 27 اکتوبر تہار دے کشمیر نا وخت آ ڈپٹی کمشنر سیوی میجر (ر) الیاس کبزئی نا کماشی ٹی کشمیری الس تون یکجہتی کن ریلی اڈ تننگا‘ ہراٹی ضلعی و سول افسر، متبر، استاد، طالب علم آتتون اوار شاری تا بھلو کچ اس بشخ ہلک۔ تہار دے کشمیر نا وخت آ ریلی نا شریدار آک کشمیری شہید آتے خراجِ عقیدت پیش کننگ و مظلوم کشمیری الس اتون یکجہتی کن اسہ منٹ اس چپ کریر و کشمیری الس نا جہد و قربانی تے خراجِ تحسین پیش کننگا و اوفتا حقِ خودارادیت نا مخ تفی نا ارادگی نا دوارگی ءِ کننگا۔ ریلی نا شریدار آک کشمیری الس تون یکجہتی نا درشانی ءِ کرسا مقبوضہ کشمیر اٹی انسانی حق آتا خلاف ورزی تا چٹفنگ و کشمیری الس نا حقِ خودارادیت نا مخ تفی نا ارادگی نا دوارگی ءِ کریر۔ دا وخت آ تران کرسا ڈپٹی کمشنر سیوی میجر (ر) الیاس کبزئی پارے کہ 27 اکتوبر کشمیر نا تاریخ نا اسہ تہار ءُ دے اسےِ، ہراتم 1947ء اٹی بھارتی فوج مقبوضہ کشمیر اٹی پترینگا۔ دا دے ءِ ہر سال تہار دے انا وڑ اٹ اڈ تننگ نا مسخت جہانی برادری نا چکار ءِ کشمیری الس نا مشکل و اوفتا حقِ خودارادیت نا کنڈ آ کرفنگ ءِ۔ او پارے کہ کشمیری الس تدوک آ کیہی دہائی تیان تینا بنداوی حق، آجوئی‘ حقِ خودارادیت نا دوئی کننگ کن جہد کننگ اٹی ءِ‘ پاکستان نا الس کشمیری ایلم و ایڑھ تتون سلوک ءِ و اوفتا سیاسی، اخلاقی و سفارتی مخ تفی ءِ برجا تخک۔ او جہانی برادری و انسانی حق آتا ادارہ غاتیا زور شاغا کہ او مقبوضہ کشمیر اٹی انسانی حق آتا رکھ و اقوامِ متحدہ نا قرارداد آتا رِد اٹ مسئلہ کشمیر نا پرامن ایسری کن تینا کڑد ءِ ادا کیر۔ ڈپٹی کمشنر مستی پارے کہ تہار دے کشمیر اڈ تننگ نا مسخت پوسکن آ نسل اٹی مسئلہ کشمیر تون تعلقدار شعور بیدار کننگ و کشمیری الس نا قربانی تے یات تخنگ ءِ۔ او پارے کہ کشمیری الس نا جہد و قربانی تے گیرام مفک و اوفتا روا انگا حق آتا مخ تفی برجا سلک۔ دا وخت آ طالب علم آک ہم تران کرسا پاریر کہ کشمیر پاکستان نا شہ رگ ءِ و کشمیری الس نا جہد نن کن کسر نا ڈیوا ءِ، اوفک پاریر کہ طالب علم آک تینا کشمیری ایلم و ایڑھ تتون سلوک ءُ و اوفتا حقِ خودارادیت نا مخ تفی ءِ کیرہ۔