تہار دے کشمیری الس نا حق خودارادیت ءِ دنیا ءِ یات کرفنگ کن ءِ،نائب وزیراعظم اسحاق ڈار

اسلام آباد، نائب وزیراعظم و وزیر خارجہ سینیٹر اسحاق ڈار پارینے کہ 27 اکتوبر 1947ء آ بھارت کانود آن چَپ گام انا کمک اٹ جموں و کشمیر آ کوزہ کرے، 27 اکتوبر نا بھارتی گام جہانی کانود و جہانی اصول آتیان چپ ئس، دادے ءِ تہار دے اڈتننگ نا مسخت دنیا ءِ کشمیر نا ویل و کشمیری الس نا حق خودارادیت نا یات ترفنگ ءِ، پاکستان کشمیری الس نا حق خودارادیت نا سیاسی، سفارتی و اخلاقی مخ تفی ءِ برجا تخک، اقوام متحدہ نا سلامتی کونسل نا قرارداد آک کشمیر نا ویل انا ایسری کن اہم بنداو ءُ، کشمیری تے اوفتا استخواہی تا رداٹ دا قرارداد آتے مون آ تخسا حق خودارادیت تننگے۔ سے شنبے نادے 27 اکتوبر آاسلام آباد ڈی چوک اٹی کشمیر تہار دے انا بنجائی دود آن نائب وزیراعظم و وزیر خارجہ اسحاق ڈار مہمانِ خصوصی نا وڑ اٹ تران کرساپارے کہ کشمیری ”کشمیر جوڑ مریک پاکستان“ نا نعرہ نا پوروی وآجوئی المی دوئی کیرہ، دا ہر پاکستانی نا است انا توار ءِ، کشمیر نا ویل ءِ جہانی کہول آ دُوارہ تالان کننگ پاکستان نا سفارتی زمواری ءِ۔ نائب وزیراعظم پارینے کہ وزیراعظم شہباز شریف و وزارت خارجہ کشمیر نا ویل ءِ جہانی فورم آتیا پدریسہ ہرفنگ ءُ، او آئی سی نا کشمیر رابطہ گروپ نا دیوان آتا ریسہ ءِ دُوارہ فعال کننگانے۔ اسحاق ڈار پارے کہ اقوام متحدہ نا جنرل اسمبلی نا دیوان نا وخت آاو آئی سی رابطہ گروپ نا دیوان نیویارک اٹی اڈتننگا، سعودی عرب، ترکیہ، عمان و ایلواسلامی ملک آتا وزیر خارجہ غاتا دیوان اٹی بشخ ہلنگ جہانی چکار نا درشانی ءِ۔ اسحاق ڈار پارے کہ دنیا کشمیر نا ویل ءِ است آن دتنے، پاکستان اودے جہانی کہول آ تالان کرسا کیک، او پارے کہ 5 اگست 2019ء آ بھارت مقبوضہ جموں و کشمیر نا آئینی حیثیت ءِ بدل کرے۔ اسحاق ڈار پارے کہ بھارت نا 5 اگست 2019ء نا گام کشمیری الس نا حق آتیان چپ ئس، اقوام متحدہ نا سلامتی کونسل نا قرارداد آک کشمیر نا ویل انا ایسری کن اہم بنداو ءُ۔