مریس مدی بھرم آتا دوئی کننگ کن مالیاتی ویل آتے ایسر کروئی تمک،وزیر مملکت خزانہ و محصولات

اسلام آباد، وزیر مملکت خزانہ و بنگکاری بلال اظہر کیانی پارینے کہ زرگزرانی سوگوی آن پد برآمد آتیا تالان مدامگی شونداری نا دوئی کننگ حکومت نا اولیت آتیٹی اوار ءِ، مریس مُدی بنداو تیا درکار نتیجہ دوئی کننگ کن مالیاتی فائدہ نا بابت ویل آتے ایسر کروئی مریک، صوبہ غاتا شونداری خڑچ آتے قومی اولیت آتون ہم گرنچ کننگ تون اوار اوار ضلع غاتیٹی وسیلہ غاتا انصاف اٹ بشخنگ و اوفتا گچین کاریم اٹ اتنگ ءِ ہم پک کننگ المی ءِ۔ پنچ شنبے نا دے سی ای او سمٹ آ ن تران کرسا وزیر مملکت پارے کہ دا تدوک آاِرا سال اٹی پاکستان زرگزرانی سوگوی نا دوئی کننگ اٹ نمان پیشرفت کرینے، پالیسی ریٹ و کبینی ٹی کمتی بسنے، جی ڈی پی نا ردوم کچ اٹ پدریسہ گچینی بسنے، و زرکوڑی تیٹی ودکی مسنے، جہانی زرگزرانی حالیت و ایندھن نا نہاد و رسد نا بابت زور آن پد ہم دا مثبت پیشرفت اہم ءِ۔۔ اوپارے کہ جہانی کریڈٹ ریٹنگ ایجنسی تا کنڈآن پاکستان نا وتواجہ کریڈٹ ریٹنگ اٹ گچینی ہم است بڈ ءِ ولے داسہ المی ءِ کہ سوگوی ءِ مدامگی و برآمد آتیا تالان شونداری ٹی بدل کننگے۔ بلال اظہر کیانی پارے کہ مدامگی شونداری ہندن مرے ہرانا بھرم آک بیرہ بڑزکو تپہ اسکان مفس بلکن راج انا کل تپہ غاک داڑان فائدہ ہرفر، برآمد آتیا تالان شونداری آن زرکوڑی تے سوگوی تننگ و ملک ءِ وار وار وام تننگ نا بریبری نا تنکی تون مون تننگ آن بچنگ اٹی کمک رسینگک۔ اوپارے کہ حکومت کاروباری برادری و برآمد کروک آتتون پدریسہ سلاہ ومشورہ کننگ ءِ و اوفتا سلاہ و مشورہ غاتے مون آ تخسا ویل آتے ایسر کننگ کن گام گیج کننگ انگ ءِ۔