الس ءِ بنداوی آسراتی تا فراوانی ٹی ڈیوالئی تے اسُل سگنگ پک،ڈپٹی کمشنر نصیرآباد وریندر لعل

نصیرآباد، وزیراعلیٰ بلوچستان میر سرفراز بگٹی نا پارت آتا رد اٹ السی ویل آتے اوفتا درگہ غا بننگ و دمدستی وڑ اٹ ایسر کننگ کن ڈپٹی کمشنر نصیرآباد وریندر لعل نا کماشی ٹی تحصیل مانجھوٹی ٹی غاو دیوان اس اڈ ہلک۔ غاو دیوان اٹی کل تعلقدار ضلعی محکمہ غاتا سروک و افسر آک بشخ ہلکر، وخت اس کہ تحصیل مانجھوٹی نا جتا جتاعلاقہ غاتیان الس نا بھلو کچ اس بشخ السا تینا ویل و مشکل آتیان ضلعی انتظامیہ ءِ معلومدار کرے‘ غاو دیوان نا وخت آ شاریک تینا ویل آتے زبانی و نوشت اٹ ڈپٹی کمشنر نصیرآباد و تعلقدار افسر آتا مون آ پیش کریر۔ الس نا کنڈ آن خاص وڑ اٹ کشت وکشار‘ تعلیم، جانجوڑی‘ بجلی نا فراوانی، روڈ و ایلو بنداوی آسراتی، شونداری ڈٹ، کنوئی دیر و ایلو السی ویل آتا پاننگا‘ ڈپٹی کمشنر نصیرآباد وریندر لعل الس نا کنڈ آن پیش کروک ویل و غاو تے سکوت اٹ خف تورے و تعلقدار محکمہ غاتا افسر آتے پارت کرے کہ السی ویل آتا ایسری کن دمدستی و گچین گام گیج کننگے‘ او افسر آتے پارت کرے کہ الس ءِ بنداوی آسراتی تا فراوانی و اوفتا روا انگا ویل آتا ایسری ٹی ہچ وڑ انا ڈیوالئی یا رے تے سگنگ مفک۔د اوخت آ جتا جتا محکمہ غاتا افسر آک تینا تینا محکمہ غاتتون تعلقدار السی غاو و سوج آتا ورندی تسر و کیہی ویل آتا ایسری کن جاگہ غا عملی گام گیج و المی کارروائی نا باوری کرفیر۔ منہ ویل آتا دمدستی ایسری کن تعلقدار افسر آتے جاگہ غا المی پارت ہم کننگا وخت اس کہ ہمو ویل آک ہرافتیکن مستی کارروائی درکار ئس اوفتیکن تعلقدار محکمہ غاتے باقاعدہ پارت جاری کننگا۔ ڈپٹی کمشنر وریندر لعل پارے کہ ضلعی انتظامیہ نا اولیکو اولیت الس ءِ ریلیف فراوان کننگ و اوفتا ویل آتا وخت آ ایسری ءِ۔ غاو دیوان تا مسخت انتظامیہ و الس نا نیام اٹی دراست رابطہ ءِ پین سوگو کننگ و السی غاو تے تعلقدار کمامدار آتسکان دمدستی سر کرسا اوفتا ایسری ءِ پک کننگ ءِ۔ او پارے کہ الس تینا ویل آتا ایسری کن ضلعی انتظامیہ تون دراست رابطہ کننگ کیک و انتظامیہ السی غاو تا ایسری کن کل دوئی وسیلہ غاتے کاریم اٹ اتیک۔