کشاری انکم ٹیکس نا ہدف اکن کل وسیلہ غاتے کاریم اٹ اتنگے،ایڈیشنل کمشنر کوئٹہ آغا سمیع اللہ

کوئٹہ، ایڈیشنل کمشنر کوئٹہ ڈویژن آغا سمیع اللہ نا کماشی ٹی لینڈ ریونیو کلیکشن و کشاری انکم ٹیکس نا ہلنگ کن ہرفوک گام گیج آتا جاچ ہلنگ نا رد اٹ اہم دیوان اس اڈہلک‘ دیوان اٹ کوئٹہ ڈویژن نا تحصیلدار، نائب تحصیلدار، سب رجسٹرار و ایلو ریونیو افسر و کارندہ غاک بشخ ہلکر۔ دا وخت آ تعلقدار ریونیو افسر آک ایڈیشنل کمشنر ءِ تینا تدوک آ شش تُو انا کارکڑدگی و پروگریس رپورٹ پیش کریر، ہرافتا جم جاچ ءِ ہلنگا۔ دیوان آن تران کرسا ایڈیشنل کمشنر کوئٹہ ڈویژن آغا سمیع اللہ پارے کہ لینڈ ریونیو کلیکشن و کشاری انکم ٹیکس ہلنگ نا ہدف تا دوئی کن کل دوئی وسیلہ غاتے کاریم اٹ اتنگے و ٹیکس ریکوری نا عمل ءِ پین ترند کننگے۔ او پارے کہ کشاری انکم ٹیکس نا پن ہدف تا دوئی کننگ اٹ ہچ وڑ انا ڈیوالئی یا سستی ءِ سگنگ مفک‘ او پارت کرے کہ محکمہ کشت وکشار آن سولرائزیشن اسکیم آن فائدہ ہرفوک کل زمیندار آتا لسٹ آتے دمدستی وڑ اٹ دوئی کننگے و ہمو زمیندار تا نشاندہی کننگے ہرافک حکومتی اسکیم آتیان فائدہ ہرفنگ آن بیدس سلوک کشاری ٹیکس و ایلو سرکاری وام تے جمع کرفتنو۔ آغا سمیع اللہ پارے کہ حکومت نا کنڈ آن زمیندار آتے سولرائزیشن، گرین ٹریکٹر اسکیم، کھد، بج و ایلو آسراتیک فراوان کننگ انگ ءُ، ولے داڑتون اوار زمیندار آتا زمواری ءِ کہ او تینا کانودی و مالی وام تے وخت آ ایتر‘ او پارت کرے کہ ٹیکس تفروک زمیندار آتا برخلاف کانود و قاعدہ نا رِد اٹ کارروائی کننگے و دا بابت تعلقدار ریکارڈ ترتیب ترسا رپورٹ پیش کننگے۔ او ڈپٹی کمشنر آتے پارت کرے کہ تینا ضلع غاتیٹی سرکاری کشاری اسکیم آتیان فائدہ ہرفوک زمیندار تا لسٹ آتے زو جوڑ کرسا پیش کیر تاکہ سلوک ٹیکس انا جاچ والمی کانودی کارروائی کننگ مرے۔ او ریونیو افسر آتے دا ہم پارت کرے کہ زمیندار ایکشن کمیٹی نا عہدیدار آتتون اوڑدہی کرسا ٹیکس تننگ نا اہمیت و حکومتی پالیسی تتون تعلقدار معلومدار فراوان کیر۔