معافی خواہنگ آتیان ویل آک ایسر مفسہ، عملی گام گیج کننگے،سینیٹر مولانا عبدالواسع

کوئٹہ، جمعیت علماء اسلام نا صوبائی امیر سینیٹر مولانا عبدالواسع پارینے کہ وزیراعلیٰ بلوچستان تینا ردینک آتیا معافی خواہسا اوفتے بدنام کرینے۔ اگہ حکومت مدرسہ و معدنیات ایکٹ انا رد اٹ سنجیدگی نشان ترسا ویل انا ایسری ءِ پک کتو تو نن ایلو سیاسی جماعت آتتون اوار آخبت نا لائحہ عمل ءِ پک کرسا برانز کینہ‘ ہراکان پد حالیت آتا کل زمواری حکومت آ مریک‘ 17 نومبر آن الس اٹ شعور بیدار کننگ و حکومت نا برخلاف سیوت کننگ کن دورہ غاتا بناءِ کینہ‘ دا خیال آتا درشانی ءِ او چار شنبے نادے تینا ہنکین اٹ صوبائی اسمبلی نا باسک فضل قادر مندوخیل، مولوی سرور ندیم موسیٰ خیل، آغا محمود شاہ، مولوی کمال الدین، غنی شہزاد تون اوار پریس کانفرنس آن تران کرسا کرے۔ مولانا عبدالواسع پارے کہ وزیراعلیٰ بلوچستان ہنداخس معافی خواہسنے کہ داسہ معافیک ہم بدنام مسنو۔ ہرا وڑ حکومت آئین و کانود آتے پد بٹسا جمعیت علماء اسلام تون بیدادی کننگ اٹی ءِ ہرانا پاش شاہدی جماعت نا سینیٹر عبدالشکور غبیزئی و بلوچستان اسمبلی نا باسک حاجی میر زابد ریکی نا پن تے ای سی ایل اٹ شاغنگ ءِ واوکان پد حکومت نا کنڈ آن بشخنداری کننگک و دا وڑوڈول عقل آن پیشن ءِ۔ بلوچستان حکومت و وزیراعلیٰ یا تو بے واک ءُ یا دوارہ فیصلہ تے قسط آتیٹی کیرہ۔ ہرا افسر آتا برخلاف کارروائی مروئی ئس او کننگپک ہرانا سوب آن گڑاک خراب ءُ۔ اگہ اوفتا برخلاف عملی گام گیج کننگپک تو بیرہ بشخنداری خواہنگ آن باندات آک ایسر مفسہ۔ او پارے کہ بلوچستان حکومت ءِ پین سگنگ مفک‘ مدرسہ آتا رجسٹریشن نا باندات آ وزیراعلیٰ میر سرفراز بگٹی بشخنداری کریسس، ولے داسکان مدرسہ غاتا رجسٹریشن نا رد اٹ حکومت پیدوار پیشرفت آن آگاہ کتنے۔ او معدنیات تون تعلقدار کانود سازی نا باندات آ ہم حکومت آ تنقید ءِ کرسا پارے کہ حکومت اپوزیشن تون درو کرے‘ بل ءِ پدی ہلنگ نا پڑو کرے، ولے ویل داسکان ہمون آن ہمون ءِ ایسر متنے۔ معدنیات نا رد اٹ اپوزیشن و سیاسی جماعت آک امنائی سلاہ اٹ اسہ ڈرافٹ اس تیار کرسا جمع کریفیسر ولے اوڑا ہچ ءُ پیش رفت اس متو ہرانا سوب آن باندات اینو ہم ہمو وڑءِ۔ او خبڑدار کرے کہ اگہ حکومت مدرسہ و معدنیات ایکٹ انا باندات آتے ٹی سنجیدگی نشان تتو و دا ویل ءِ سلابت اٹ ایسر کتو تو جمعیت علماء اسلام ایلو سیاسی جماعت آتتون اوار مرسا آخبت نا لائحہ عمل ءِ پک کرسا برانز کیک۔