جھل مگسی ٹی شونداری کاریم تا آب آ ہم خاص چکار کننگ نا گرج ءِ،ڈپٹی کمشنر جھل مگسی سید رحمت اللہ شاہ

جھل مگسی، ڈپٹی کمشنر جھل مگسی سید رحمت اللہ شاہ تون ضلع نا جتاجتا سرکاری محکمہ غاتا افسر و ضلع ٹی السی آسودہی کن کاریم کروک جتا جتا تنظیم آتا فوکل پرسنک اوڑدہی کریر۔ اوڑدہی نا وخت آ ضلع ٹی برجا شونداری ڈٹ، السی آسراتی تا فراوانی، تعلقدار محکمہ غاتا کارکڑد و آسودہی سرجز آتتون اوار ایلو چندی باندات آتا جم جاچ ءِ ہلنگا۔ دیوان اٹ ایڈیشنل ڈپٹی کمشنر جھل مگسی عبدالغفور جمالی، ایکسین بی اینڈ آر بلڈنگ جھل مگسی ظفر اقبال ابڑو، پرنسپل انٹر کالج جھل مگسی مظفر علی، ایکسین روڈ ثابت علی، ڈاکٹر منصور احمد ترین ضلعی آفیسر چاگڑد خادم حسین مگسی وخت اس کہ جھل مگسی ٹی کاریم کروک جتا جتا آرگنائزیشن آتا فوکل پرسن سیف اللہ لاسکانی مگسی تون اوار ایلو تعلقدار افسر و نمائندہ غاک بشخ ہلکر۔ دا وخت آ تعلقدار افسر و تنظیم آتا نمائندہ غاک تینا تینا محکمہ و ادارہ غاتا جم کارکڑد‘ برجا شونداری و آسودہی نا ڈٹ، الس ءِ فراوان کروک آسراتی و آخبت نا لائحہ عمل نا حوالہ ترسا ڈپٹی کمشنر سید رحمت اللہ شاہ ءِ جم بریفنگ تسر۔ اوفک برجا ڈٹ آتیا پیشرفت، مون تروک آ ویل و اوفتا ایسری کن کروک گام گیج آتیان ہم معلومدار کریر۔ ڈپٹی کمشنر سید رحمت اللہ شاہ افسر آتے پارت کرے کہ ضلع اٹی برجا کل شونداری و آسودہی ڈٹ آتا وخت آ پوروی تون اوار تفوئی کاریم تا آب آ ہم خصوصی چکار کننگے۔ او پارے کہ سرکاری ادارہ غاتا زمواری ءِ کہ او الس ءِ بنداوی آسراتی تا فراوانی، اوفتا ویل آتا دمدستی ایسری و السی آسودہی تون تعلقدار باندات آتے اولیتی بنداو آ پک کیر۔ ڈپٹی کمشنر تعلقدار افسر آتے پارت کرے کہ تینا تینا محکمہ غاتا برجا ڈٹ و سرجز آتا باقاعدگی اٹ جاچ ءِ ہلیر‘ ڈپٹی کمشنر ضلع ٹی کاریم کروک فلاحی تنظیم آتا خذمت آتا ستاءِ کرسا پارے کہ السی ویل آتا ایسری و راج انا گچینی کن سرکاری ادارہ و غیر سرکاری تنظیم آتا نیام اٹی گچین رابطہ و کمکاری وخت انا اہم ءُ گرج اسے۔ او کل تعلقدار ادارہ غاتے پارت کرے کہ السی فائدہ غاتے اولیکو اولیت ترسا تینا زمواری تے گچین وڑ اٹ سر ایتر۔