گوادر ایمبولنس سروس آن داتم اسکان 4 ہزار ناجوڑ فائد ہرفینو،ڈپٹی کمشنر گوادر نقیب اللہ کاکڑ

گوادر، ڈپٹی کمشنر گوادر نقیب اللہ کاکڑ نا کماشی ٹی حکومت بلوچستان نا رائز پروگرام نا رد اٹ گوادر ایمبولنس سروس کن گرانٹ نا فراوانی نا رد اٹ دود اس اڈہلک‘ دود اٹ بلوچستان رائز پروگرام، ضلعی انتظامیہ و گوادر ایمبولنس سروس نا نمائندہ غاتتون اوار چندی بشخ آتیان تعلقدار بندغ آک بشخ ہلکر۔ بلوچستان رائز پروگرام حکومت بلوچستان نا اسہ اہم ءُ پروگرام اسے ہرا بلوچستان رورل سپورٹ پروگرام (BRSP) نا کمکاری اٹ برجاءِ، ہرانا مسخت ہندی ادارہ غاتے واکدار جوڑ کننگ، السی بشخ ہلنگ ءِ شون تننگ، راجی ہم گرنچی ءِ سوگو کننگ و راج اٹی مدامگی امن و سوگوی کن گام گیج آتے شون تننگ ءِ۔ دود اٹ چیئرمین گوادر ایمبولنس سروس نسیم موسیٰ سروس نا کارکڑدگی و خذمت آتا حوالہ ءِ ترسا جم بریفنگ تس۔ او پارے کہ گوادر ایمبولنس سروس نا جوڑ کننگ آن داتم اسکان کساس 4 ہزار 10 ناجوڑ، میت و جتا جتا ہلہلہ ئی کیس تے طبی آسراتی و ہن و بر نا خذمت آک فراوان کننگانو، ہرافتے ٹی ٹریفک شکست‘ ناجوڑی، ایمرجنسی و میت آتا سر کننگ تون اوار ایلو کیس آک اوار ءُ۔ او پارے کہ السی گرج آتیا چکار کرسا آخبت اٹی جیونی ٹی ہم ایمبولنس سروس بنا کننگ نا ڈٹ بندی کننگ انگ ءِ۔ دا وخت آ ڈپٹی کمشنر گوادر نقیب اللہ کاکڑ گوادر ایمبولنس سروس نا السی خذمت آتاستاءِ کرسا چیئرمین و مچ ٹیم انا کوشست آتا است بڈی ءِ کرے۔ او ضلعی انتظامیہ نا کنڈ آن گوادر ایمبولنس سروس کن توئی فیول کوٹہ پک کننگ نا پڑو ءِ کرے تاکہ سروس نا بیدس اڑاند فراوانی ءِ پک کننگ مرے۔ ڈپٹی کمشنر پارے کہ ضلع گوادر اٹی بھلو وخت اسے آن خراب مروک ہفت ایمبولنس ءِ بی ایس ڈی آئی نا رد اٹ بحال کرسا دوارہ روڈ آتیا اتنگک وخت اس کہ گرج انا رِد اٹ جوان حالیت اٹی ساڑی منہ ایمبولنس ہم گوادر ایمبولنس سروس ءِ تننگ کن گام گیج کننگک۔