پک کروئی تمک کہ بھارت سندھ طاس معاہدہ غا زمواری تے پورو کے،اسحاق ڈار،انتونیو گوتریس

اسلام آباد، نائب وزیراعظم و وزیرخارجہ اسحاق ڈار پارینے کہ پاکستان خواہک کہ جھیڑہ غاتے چٹفنگ کن اقوامِ متحدہ نا بنجائی حیثیت برجا سلے، پک کروئی تمک کہ بھارت سندھ طاس معاہدہ نا رد اٹ زمواری تے پورو کرے وخت اس کہ اقوامِ متحدہ نا سیکرٹری جنرل انتونیو گوتریس پارینے کہ فلسطینی الس ءِ حق خودارادیت ملنگ اسکان ڈیہہ اٹی امن بننگ کپک‘ 2022 نا نوکاپ اٹی خنوک بھسکاری نا ندارہ غاتے ہچ گہس گیرام کپنہ‘ شون ہلوک ملک آتے تینا قول تے پورو کروئی تمک۔ تدوک آد ے اوڑدہی آن پد پریس کانفرنس آن تران کرسا وزیرِ خارجہ اسحاق ڈار پارے کہ جہانی ادارہ نا سیکرٹری جنرل نا پاکستان آ بننگ ءِ بخیرٹ پانہ‘ سیکرٹری جنرل بھاز گٹ مروک شیڈول آن پد ہم پاکستان نادورہ کننگ نا سلہ ءِ امنا کرے۔ پاکستان یو این چارٹر نا اصول آتیا عملدرآمد کن سنبرینگوک ءِ، انتونیو گوتریس نا سرکڑدہی آن خوش ان‘ انتونیو گوتریس پاکستان نا بھلو سنگت اسے‘ پاکستان نا الس 2022 نا نوکاپ اٹ انتونیو گوتریس نا سنگتی آ کڑدار ءِ گیرام کپک۔ اسحاق ڈار پارے کہ جہانی ادارہ نا سیکرٹری جنرل تون اوڑدہی ٹی کل اہم جہانی و ڈیہہ ئی باندات آتیا گپ وتران مس۔ انتونیو گوتریس تون اوڑدہی ٹی فلسطین و مقبوضہ جموں و کشمیر نا حالیت آ ہم ہیت مس، پاکستان سفارت کاری و مذاکرات نا کمک اٹ چک وتاڑ اٹ کمتی نا خواہندار ءِ، سفارت کاری ءِ سرسہبی نا پورو وارخواہی تروئی تمک‘ سیکرٹری جنرل نا کنڈ آن پاکستان نا خیرخواہی و مذاکرات نا کوشست تا مخ تفی ناستاءِ کینہ۔ نائب وزیراعظم پارے کہ پاکستان خواہک کہ چک وتاڑ نا ایسری کن اقوامِ متحدہ نا بنجائی حیثیت برجا سلے، سیکرٹری جنرل نا کنڈ آن ڈیہہ اٹ امن و چک وتاڑ نا چٹفنگ کن کوشست آتاستاءِ کینہ‘ پک کروئی تمک کہ بھارت سندھ طاس معاہدہ نا رد اٹ زمواری تے پورو کرے، پاکستان اقوامِ متحدہ تون مرغن شریداری ناستاءِ کیک‘ دا وخت آ یو این سیکرٹری جنرل انتونیو گوتریس پارے کہ 10 سال اسکان یو این ہائی کمشنر پناہ گزین ہم مسونٹ‘ پاکستان اہم ڈیہی باندت آتیا بھاز اہمیت تخک۔