حکومت بلدیاتی گچین کاری تیکن پورو وڑ اٹ سنبرینگوک ءِ،میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹی بلدیاتی نظام ءِ سوگو کرسا الس ءِ گچین میونسپل سروسز نا فراوانی و سفائی نا نظام ءِ پوسکنو وڑ خواست آتتون ہمگرنچ کننگ کن عملی گام گیج کننگ انگ ءِ‘ اولیکو ریسہ ٹی صوبہ نا کل میونسپل کمیٹی تے پوسکنوڑ مشینری و المی ازباب آتیان شپ کننگ انگ ءِ وخت اس کہ ارٹمیکو ریسہ ٹی یونین کونسل، چنکا ٹاؤن و خلقی علاقہ غاتسکان دا آسراتی ءِ پین تالان کننگک‘ دا خیال آتا درشانی ءِ او دوشنبے نا دے صوبائی ڈیزاسٹر مینجمنٹ اتھارٹی آفس اٹی محکمہ لوکل گورنمنٹ نا کنڈ آن میونسپل سروسز انیشی ایٹو 2026 نا رد اٹ لوکل گورنمنٹ ادارہ غاتے پوسکنوڑ مشینری نا فراوانی نا دود آن تران کرسا کرے۔ دا وخت آ وزیراعلیٰ نا سلاہکار لوکل گورنمنٹ نوابزادہ بابا امیر حمزہ زہری ڈٹ انا خصوصیت آتیا ہیت کرے۔ دود اٹ صوبائی میر شعیب نوشیروانی، میر صادق عمرانی، میر سلیم خان کھوسو، میر ظہور احمد بلیدی، حاجی علی مدد جتک، میر عاصم کرد گیلو، ملک نعیم بازئی، چیف سیکرٹری بلوچستان شکیل قادر خان، ایڈیشنل چیف سیکرٹری شونداری زاہد سلیم، وزیراعلیٰ بلوچستان نا کمکار حوالکاری و سیاسی باندات شاہد رند، ڈائریکٹر جنرل پی ڈی ایم اے جہانزیب خان، سیکرٹری لوکل گورنمنٹ رؤف بلوچ، محکمہ تا سیکرٹریک، کمشنر کوئٹہ، ایلو بڑزکو کمامدار و شرفمند مہمانک بشخ ہلکر۔ داوخت آ وزیراعلیٰ بلوچستان پارے کہ اینو نا دے بلوچستان کن اہم ءِ‘ خاص وڑ اٹ ہمو سنگت آتیکن ہرافک صوبہ نا الس نا خذمت کن کاریم کننگ اٹی ءُ‘ بلوچستان اٹی دا تینا وڑ انا اولیکو گام ءِ‘ ہرانا رد اٹ میونسپل کمیٹی تے پوسکنوڑ مشینری فراوان کننگ انگ ءِ تاکہ شار تیٹی سفائی و میونسپل سروسز نا نظام ءِ گچین جوڑ کننگ مرے‘ او پارے کہ بلوچستان اٹی لوکل گورنمنٹ نا نظام ساڑی ءِ و صوبہ ملک انا اسٹ انگا صوبہ ءِ ہراڑے بلدیاتی گچین کاری اڈتننگانو‘ ہندی حکومت آتا ساڑی وخت فروری 2027ء ٹی پورو مننگ اٹی ءِ‘ ہراکان پد بلدیاتی گچین کاری اڈ تننگک‘ حکومت بلوچستان آخبت نا بلدیاتی گچین کاری تا اڈ تننگ کن پورو وڑ اٹ تیار ءِ و بلدیاتی نظام ءِ پین سوگو کننگ تون اوار گچین کاری تا اڈ تننگ اٹ ہچ وڑا نا رے تے و بہانہ کننگپک۔ میر سرفراز بگٹی پارے کہ گچین کاری تیان پد میونسپل کمیٹی تا کہول آ الس ءِ گچین آسراتی تا فراوانی و ادارہ غاتا کارکڑد اٹ پین گچینی کن گام گیج کننگک‘ لوکل گورنمنٹ ہمو نظام ءِ ہرانا دراست رسینگ لس بندغ اسکان ءِ و اوے گچین جوڑ کننگ آن گورننس نا آب اٹ گچینی بریک‘ وزیراعلیٰ پارے کہ نن تون انسانی وسیلہ غاک مچٹ ءُ وخت اس کہ السی گرج و میونسپل سروسز نا دنگ شابیت ءِ‘ دنیا پوسکنوڑ ٹیکنالوجی و مشینری نا کنڈ آ مستی ہننگ اٹی ءِ‘ دا سوب آن بیرہ انسانی واک انا کمک اٹ سفائی نا نظام ءِ گچین جوڑ کننگ مننگ کپک‘ ہندا گرج آ چکار کرسا میونسپل سروسز کن پوسکنوڑ مشینری فراوان کننگ نا فیصلہ کننگانے۔