سلابت نا متکن آ عذر ختم، پی ٹی آئی حکومتی سلاہ تا ورندی ءِ تتنے،عطاء اللہ تارڑ

اسلام آباد، بنجائی حوالکاری وزیرِ عطاء اللہ تارڑ پاکستان تحریکِ انصاف نا راہشون سلمان اکرم راجہ نا ٹویٹ آ ردِ عمل ترسا پارینے کہ پی ٹی آئی نا کنڈ آن سلابت مفننگ نا متکن آ موقف داسہ برجا سلپک، انتئے کہ بنجائی حکومت تینا سلاہ تے تسنے ولے تحریکِ انصاف نا کنڈ آن اینو اسکان ہچ ءُ ورندی اس ملتنے، عطاء اللہ تارڑ پارے کہ خیبرپختونخوا حکومت نا سیاسی وڑ اٹ نزور مننگ آن پد داسہ تینا سیاسی سرمایہ ءِ رکھوک تخنگ کن اسیجائی لائحہ عمل و سلابت اسے نا ہیت کننگنگ اٹی ءِ۔ اونا رِد اٹ زوراکی ای برسا سلابت و اسیجائی گام گیج آتا ہیت کننگ پی ٹی آئی نا مستین نا حکمتِ عملی نا بشخ اس مسنے، وخت اس کہ عملی کہول آ حالیت آک داڑان چَپ خننگ انگ اٹی ءُ، بنجائی حوالکاری وزیرِ دُوبہ خلک کہ خیبرپختونخوا حکومت نا پالیسی صوبہ ٹی دہشت گردی تالان مننگ نا است بڈی ءِ کیک و دہشت گردی نا باندات آ پی ٹی آئی نا بیانیہ دہشت گرد آتا حق اٹی کاہک، او سوج ہرفے کہ خیبرپختونخوا حکومت بنجائی اپیکس کمیٹی نا دیوان تیٹی بشخ انتئے ہلپک و صوبائی کہول آ تینا اپیکس کمیٹی نا دیوان انتئے اڈ تفک، اونا ودیک پاننگ ئس کہ صوبائی کابینہ پاکستان اٹی دہشت گردی و سیم آن ایپار جلہو آتا بابت مذمت انتئے کپک، عطاء اللہ تارڑ خیبرپختونخوا حکومت آن دا ہم سوج کرے کہ نیشنل ایکشن پلان آ عملدرآمد انتئے کننگتنے و شہید آتا جنازہ غاتیٹی صوبائی کماشی آتا بشخ ہلنگ اخس مسنے؟ او پارے کہ سیکورٹی فورس آتتون یکجہتی نا درشانی کن چوکی تا دورہ و پاک اوغان سیم آ زمواری سر تروک آ فرنٹیئر کور نا ورنا تتون اوار سلنگ اہم ءُ زمواری اسے، بنجائی وزیر دعویٰ کرے کہ نیشنل ایکشن پلان آ عملدرآمد مفننگ نا سوب آن خیبرپختونخوا ٹی دہشت گردی ٹی ودکی مس و صوبہ نا زرگزران ءِ نسخان رسینگا، ہرانا زموار تحریکِ انصاف ءِ۔