ہفت شڑت پورو مننگ اسکان آبنائے ہرمز یلہ کننگپک،محمد باقر قالیباف
ایران تینا گام گیج آتا فیصلہ ءِ مخالف فریق نا حقی رویہ و عملی گام گیج آتے مون آ تخسا کیک، ایرانی اسپیکر
Get real time updates directly on you device, subscribe now.
تہران، ایرانی پارلیمنٹ نا اسپیکر محمد باقر قالیباف دعویٰ کرینے کہ امریکہ زوت آتیٹ خیرخواہ تا کمک اٹ ایران ءِ منہ سلاہ پیش کرینے، ولے تہران پیدوار کرینے کہ اسلام آباد مفاہمت نا یادداشت اٹی پک مروک ہفت شڑت انا پورو مننگ اسکان آبنائے ہرمز یلہ کننگپک، پارلیمنٹ نا دیوان آن تران کرسا محمد باقر قالیباف امریکی سلاہ تا بشخ آتے پاتو، ولے دا پارے کہ وخت زیان کننگ و اسہ کنڈی خواست بیٹ کننگ نا دور خلاس مسنے، او پارے کہ تانکہ اسلام آباد مفاہمت نا یادداشت نا بنداو آ ایران نا ہفت شڑت پورو کننگپسہ، آبنائے ہرمز ءِ یلہ کننگ نا فیصلہ کننگپک، محمد باقر قالیباف پارے کہ ایران نئے جذباتی ءِ و نئے خلوک، بلکہ اسہ کنڈ آن عسکری پڑ آ مون تننگ اٹی ءِ۔ ارٹمیکو کنڈ آ مذاکرات ہم برجا تخانے، اونا رِد اٹ ایران تینا پورو واکداری اٹ عسکری پڑ آ ساڑی ءِ۔ و پوسکن آ کارروائی تا کمک اٹ مخالف آتتون مون تننگ ءِ، ایرانی پارلیمنٹ نا اسپیکر نا رِد اٹ سفارتی پڑ آ ہم کوشست آک برجا ءُ تاکہ عسکری پڑ آ ایران نا پوزیشن ءِ سوگو تخنگ تون اوار ایرانی الس نا حق آتا رکھ پک کننگ مرے، امریکی کمامدار آتا وڑ پہ وڑ بیان تا ہیت ءِ کرسا محمد باقر قالیباف پارے کہ ایران تینا جم پالیسی و قومی سلامتی آن تعلقدار فیصلہ غاتے امریکی کمامدار آتا راجی رابطہ غاتا ویب سائٹ آتیٹی جاری مروک آ پوسٹ یا ہڑدے ئی تننگوک آ انٹرویو تا بنداو آ کپک، او پارے کہ ایران تینا گام گیج آتا فیصلہ ءِ مخالف فریق نا حقی رویہ و عملی گام گیج آتے مون آ تخسا کیک۔