حکومت و اپوزیشن نا نیام اٹ مذاکرات چٹا‘ ارٹمیکو دور اینو مریک

اسلام آباد، حکومت و اپوزیشن نا نیام اٹی برجا مذاکرات نا اولیکو دور بے بھرم چٹا‘ مذاکرات نا ارٹمیکو دور اینو شنبے نا دے دوارہ مریک‘ مذاکرات اٹی حکومت نا کنڈ آن لانگ مارچ ءِ دمدستی چٹفنگ نا پاننگا‘ حکومت و اپوزیشن جماعت آتا نیام اٹی مذاکرات اسپیکر قومی اسمبلی نا چیمبر اٹی مس۔ حوالی نا رد اٹ بنجائی وزیرِداخلہ محسن نقوی خیبر پختونخوا اٹی امن و ایمنی نا حالیت آتیا جم بریفنگ تس۔ ودوک آ دہشت گردی و ساڑی واقعہ غاتا سوب آتیا ہم بریفنگ تننگا۔ حوالی نا رد اٹ حکومتی ٹیم بانی پی ٹی آئی نا یلہ کننگ نا باندات آ سخت موقف تینائی کرسا پارے کہ بانی پی ٹی آئی نا یلہ کننگ نا باندات ہیت مفک۔ حکومتی ٹیم پیدوار کرے کہ اسلام آباد آ جلہو نا ہچ وڑ اٹ موکل تننگپک۔ لانگ مارچ، دھڑکو و اڈیالہ جیل آ جلہو نا ہیت راست اف۔ حکومت پارے کہ بیرہ حکومت نرمی نشان تفک بلکہ اپوزیشن ءِ ہم نرومی کروئی تمک۔ حوالی نا رد اٹ تحریِک انصاف نا چیئرمین بیرسٹر گوہر علی خان پارے کہ او بھلا است اٹ مذاکرات اٹی بسنے۔ رانا ثناء اللہ پارے کہ نن ہم ہیت و گپ نا سرسہبی نا خواہندار اُن ولے چاپ اِرا دو اٹ مریک۔اسد قیصر پارے کہ اخس کہ باندات مریر او اوار تولنگ اٹ ایسر مریرہ۔ او ساڑی حکومت ءِ فارم 47 نا حکومت گوندسا پارے کہ دا وخت آ مذاکرات مننگ اٹی ءِ ہندا سوب آن داڑا ہچ ہیت کپرہ۔ مذاکرات نا ارٹمیکو دور اٹی عدالتی باندات آتے ٹی رانا ثناء اللہ و اپوزیشن لیڈر سینیٹ راجہ ناصر عباس اسٹ ایلو آ ترند مسر۔ راجہ ناصر عباس عدالتی فیصلہ غاتیا پورو عمل کپننگ‘ بانی چیئرمین تون اوڑدہی تیا رکھ و حکومتی گام گیج آتیا نااومیتی نا درشانی ءِ کرے۔ رانا ثناء اللہ پارے کہ عدالت آک تینا کاریم ءِ کننگ اٹی ءُ و لانگ مارچ انا رد اٹ عدالتی فیصلہ غاتیا عمل کننگک۔ اسپیکر فریق آتیا فہم اٹ مستی ہننگ و تحمل نشان تننگ آ زورشاغا۔ مذاکرات اٹی کیہی وار تحریک انصاف و حکومتی ٹیم اسٹ ایلو آ ترند مسر وخت اس کہ پیپلز پارٹی نا باسک آک زیات تر چُپ ئسر۔ حوالی نا رد اٹ حکومت اپوزیشن تون باضابطہ وڑ اٹ لانگ مارچ ءِ پد بٹنگ یا منسوخ کننگ نا خواست کرے۔ حکومت عدالتی فیصلہ غاتیا عملدرآمد نا باوری ہم کرفے۔ اپوزیشن راہشونک تینا سرکڑدہ غاتے سلاہ اٹ ہلنگ نا فیصلہ کریر۔