بھارت نا ’فالس فلیگ آپریشن‘ نا پات پاش مس،لیفٹیننٹ جنرل احمد شریف چوہدری

راولپنڈی، ڈائریکٹر جنرل انٹر سروسز پبلک ریلیشنز لیفٹیننٹ جنرل احمد شریف چوہدری پارینے کہ 29 ستمبر آ کوزہ کروک جموں و کشمیر اٹی بھارتی فوج انا کنڈآن کروک آپریشن تون تعلقدار مونی بروک حوال آتے ٹی کیہی تضاد آکساڑی ءُ و پاکستان نا رِد اٹ دا اسہ پاننگوک فالس فلیگ کارروائی اسے، بھارت اگہ فالس فلیگ راگ کننگ یا مہم جوئی نا کوشست کرے تو اودے ہندن بوزپرغوک ورندی تننگک ہرادے اونا بروک آ چینک ہم یات کرور۔ بھارت اٹی اینو مسلمان، عیسائی‘ سکھ و ایلو پدتموک ذات آتتون تعلقداربندغ آک ریاستی بیدادی نا گواچی ءُ، ننا واسطہ اسہ بھاز پراگندہ ءُ دشمن اسے تون تمانے۔پریس کانفرنس آن تران کرسا ترجمان پاک فوج ڈی جی آئی ایس پی آر بھارتی دعویٰ نا ٹک و اوکان گڈ مون آ بروک جتا جتا حوال آتا حوالہ ءِ تس‘ بھارتی فوج 29 ستمبر آ کوراگ، یوسمرگ نا علاقہ ٹی اسیجائی سرچ آپریشن نا ڈہ تسوسس، وخت اس کہ اخیر اٹ اسہ بندغ اسے محمد آصف عرف ہاشم موسیٰ نا پن اٹ درست اودے لشکرِ طیبہ نا پاننگوک دہشتگرد گوندا‘ بھارتی فوج دا کارروائی ٹی ہمو بندغ نا زوال و پاننگوک جنگی گڑاتا دوئی کننگ نا دعویٰ ہم کریسس۔ ڈی جی آئی ایس پی آر نا رِد اٹ بھارتی فوج انا اولیکو حوال اٹ زوال مروک آ بندغ نا پن ءِ پاننگتویسس ولے کساس ہفت ونیم گھنٹہ غان پد اودے محمد آصف عرف ہاشم موسیٰ گوندنگا‘۔ داکان پد بھارتی میڈیا ٹی پین دعواک مون آ بسر ہرافتے ٹی ہندا بندغ ءِ مسکوہی پاکستانی فوجی و ایس ایس جی کارندہ پاننگا‘ لیفٹیننٹ جنرل احمد شریف چوہدری پارے کہ بھارتی میڈیا دا بندغ تون تعلقدار پاک فوج انا سروس نمبر تون اوار کیہی سرجم آتے نشر کرے و اودے مسکوہی حوالدار گوندا‘ بھارتی حوال آتے ٹی دا دعویٰ ہم کننگا کہ محمد آصف 2000ء اٹی پاک فوج اٹی اوار مس و اوکان پد ایس ایس جی تون تعلقدار مس‘ دا دعواک بھارتی حوالی و میڈیا رپورٹ آتیان ءُ، وخت اس کہ پاکستان دا دعویٰ و اوفتیان کشوک بھرم تے مسترد کرینے۔ ڈی جی آئی ایس پی آر پریس کانفرنس نا وخت آ ضلع اٹک آن تعلقدار ریٹائرڈ حوالدار محمد آصف ءِ میڈیا نا مون آ پیش کرے۔ پاکستان نا موقف نا رِد اٹ محمد آصف زندہ ءِ و راولپنڈی اٹی تینا خاہوت تون اوار ساڑی ءِ‘ ہرادے پاک فوج بھارتی دعویٰ نا ورندی ٹی اہم شاہدی نا وڑ اٹ پیش کرے‘ محمد آصف پارے کہ او 2000ء اٹی پاک فوج اٹی اوار مس و اوکان پد ایس ایس جی تون تعلقدار مس‘ او پارے کہ ریٹائرمنٹ آن پد او راولپنڈی اٹی تینا لس زند ءِ گدریفنگ اٹی ءِ او پارے کہ منہ وخت آن اودے بھارتی نمبر آتیان فون کال بسکہ و اونا جندی معلومداری دوئی کننگ نا کوشست کننگا، ولے او ہمو نمبر آتے بلاک کرے؛ اوکان پد اودے سنگت آتا کمک اٹ سما تما کہ بھارتی میڈیا ٹی اونا پن اٹ خبر تالان کننگ انگ ءِ کہ اودے مقبوضہ کشمیر ٹی اسہ کارروائی ٹی خلنگانے۔ ڈی جی آئی ایس پی آر پریس کانفرنس اٹی بھارتی بیانیہ نا زمانی ترتیب آ ہم ہیت کرے‘ او پارے کہ اول اسہ نادرست بندغ اسے نا زوال نا حوال تننگا‘ اوکان پد اونا پن ءِ محمد آصف عرف ہاشم موسیٰ پاننگا و اوکان پد بھارتی میڈیا اودے مسکوہی پاکستانی ایس ایس جی کارندہ گوندسا اونا پاننگوک عسکری زند آن تعلقدار ٹک آتے نشر کننگ بنا کرے۔