وزیراعظم نا پارت، پاکستان آسان خذمت ہند آتے ودفنگ نا فیصلہ

اسلام آباد، وزیراعظم محمد شہباز شریف نا کماشی ٹی پاکستان آسان خذمت سینٹر نا کارکڑد، ودکی و ملک انا جتا جتا علاقہ غاتیٹی پوسکن ہند جوڑ کننگ نا بابت دیوان اڈہلک‘ دیوان اٹ وزیراعظم شاری تے ترند‘ شفاف و آب اٹو سرکاری خذمت آتا فراوانی نا ارادگی نا دوارگی کرسا پارے کہ الس ءِ سرکاری خذمت تا دوئی کننگ کن دفتر آتا چکر خلوئی تمپ‘ او پارے کہ آسان خذمت ہند آتا کمک اٹ شاری تے اسہ چھت انا کیرغ آن سرکاری خذمت آتا وخت آ فراوانی حکومت نا اولیکو اولیت ءِ‘ وزیراعظم اسلام آباد نا پاکستان آسان خذمت سینٹر اٹی جتا جتا آسراتی تا فراوانی نا وخت ءِ پین کم کننگ، بنجا نا ودکی نا عمل ءِ تیز کننگ و شاری تا گرج آتا رِد اٹ کاؤنٹر آتیا کارندہ غاتا کچ ءِ ودفنگ نا پارت کرے‘ او ہند انا کارکڑد نا تھرڈ پارٹی آڈٹ رپورٹ ہم پیش کننگ نا پارت کرے‘ دیوان اٹی بریفنگ اٹ پاننگا کہ اسلام آباد نا آسان خذمت ہند اٹ جنوری آن ستمبر اسکان اسہ لکھ 71 ہزار آن زیات درخواست آتیا کارروائی کننگانے،خت اس کہ ہند انا خذمت آتیا 99.5 درسَد شاری است جمی نا درشانی ءِ کریر‘ بریفنگ نا رِد اٹ ہند اٹ خذمت آتا فراوانی نا وخت 3 آن 10 منٹ ءِ‘ وزیراعظم مظفرآباد، گلگت و اسکردو ٹی آسان خذمت ہند آتیا برجا کاریم ءِ تیز کرسا اوفتے زوت فعال کننگ نا پارت کرے‘ او پشاور و بنوں ٹی ہم آسان خذمت ہند جوڑ کننگ کن دمدستی گام گیج بنا کننگ و ہموڑے ساڑی بنجائی ماڑی تے ٹی ہند آتے جوڑ کننگ نا جم ڈٹ ءِ زوت پیش کننگ نا پارت کرے‘ وزیراعظم پارت کرے کہ پرائیویٹ بشخ انا کمک اٹ ملک انا ایلو علاقہ غاتیٹی ہم آسان خذمت سینٹر جوڑ کننگے تاکہ شاری تے سرکاری خذمت آتا دوئی کننگ اٹی آسراتی رسینگ کے‘ دیوان اٹ بنجائی وزیر ڈاکٹر مصدق مسعود ملک، احد خان چیمہ، عطاء اللہ تارڑ، شزا فاطمہ خواجہ، طارق فضل چوہدری و تعلقدار ادارہ غاتا بڑزکو افسر آک بشخ ہلکر۔