صوبائی سیکرٹری و افسر آک ٹینڈر نا عمل ءِ صاف و شفاف جوڑ کیر‘ملک غفار مندوخیل

کوئٹہ، آل بلوچستان گورنمنٹ کنٹریکٹرز ایسوسی ایشن نا چیئرمین ملک عبدالغفار مندوخیل و صدر میر عبدالسلام لانگو نا کماشی ٹی کوئٹہ پریس کلب اٹ آل گورنمنٹ کنٹریکٹرز ایسوسی ایشن نا بنجائی‘ ڈویژن و ضلع غاتا عہدیدار آتا اسیجائی دیوان اس اڈ ہلک۔ دیوان اٹ جنرل سیکرٹری ملک مجیب مہترزئی، صلاح الدین کبزئی، سرور جان مندوخیل، محمد ادریس جان لانگو، سراج خان کاکڑ، میر بیروز ملازئی، سمیع اللہ کاکڑ، حاجی محمد ابراہیم اچکزئی، میر ابرار رئیسانی، میر عدنان لہڑی، میر سلیم بنگلزئی، صاحبزادہ بسم اللہ خان و ایلوفک بشخ ہلکر۔ دیوان اٹ 3 اکتوبر آ مروک سوغندی دود انا بندوبست آتے گڈیکو دروشم تننگا و دود انا بندوبست آتیکن کمیٹی جوڑ کننگا۔ دیوان آن تران کرسا ملک عبدالغفار مندوخیل، میر عبدالسلام لانگو، ملک مجیب مہترزئی و ایلوفک پاریر کہ آل بلوچستان گورنمنٹ کنٹریکٹرز ایسوسی ایشن مچ آ بلوچستان نا ٹھیکیدار آتا نمائندہ تنظیم ءِ‘ ہرا آئین و منشور اٹ مرسا ٹھیکیدار برادری نا ویل آتا ایسری کن توار بڑز کننگ اٹی ءِ۔ او پاریر کہ آل بلوچستان گورنمنٹ کنٹریکٹرز ایسوسی ایشن نا وزیراعلیٰ بلوچستان، صوبائی سیکرٹری و کل محکمہ غاتا آفیسر آتیان خواست ءِ کہ او ٹینڈر نا عمل ءِ صاف و شفاف جوڑ کیر و ٹھیکیدار برادری ءِ سٹی تنک کننگ و است پسند بندغ آتے خوش کننگ نا ریسہ ءِ دمدستی وڑاٹ بند کننگے۔ او پاریرکہ بی ایس ڈی آئی (BSDI) ٹی ڈپٹی کمشنر و تعلقدار افسر آتا کنڈآن ٹینڈر اوپن کننگ نا جاگہ غا تینا است پسند بندغ سرتننگ انگ ءِ ہرانا آل بلوچستان گورنمنٹ کنٹریکٹرز ایسوسی ایشن مذمت ءِ کیک و بی ایس ڈی آئی نا بڑزکو کمامدار آتیان خواست کیک کہ ہراڑے کہ بے قاعدگی، وڑوڈول نا خلاف ورزی یا غاو تا دروشم اٹ کنڈ غیر ہلپروک و شفاف جاست و پاست کرفنگے۔ او پاریر کہ آل بلوچستان گورنمنٹ کنٹریکٹرز ایسوسی ایشن صوبائی پی ایس ڈی پی نا برخلاف بلوچستان ہائیکورٹ اٹ پٹیشن دائر کریسس ہرا اینو الحمدللہ باضابطہ وڑاٹ سماعت کن منظور مسنے و دا رد اٹ کل تعلقدار فریق آتے باقاعدہ نوٹس جاری کننگانے۔ او پاریر کہ الحمدللہ اینو اسہ وار ولدا دا ہیت پک مس کہ آل بلوچستان گورنمنٹ کنٹریکٹرز ایسوسی ایشن ہمو اسٹ انگا منظم پلیٹ فارم ءِ ہرا مچ آ بلوچستان نا ٹھیکیدار آتا نمائندگی ءِ کننگ ءِ و تینا حق آتے کن ہر آئینی، کانونی و جمہوری کسر تینائی کننگ نا لائخی تخک۔