خیبرپختونخوا ٹی گورنر راج آئینی و کانودی کسر اسے، امیر مقام

پشاور، پاکستان مسلم لیگ (ن) خیبرپختونخوا نا صوبائی صدر و بنجائی وزیر کشمیر و گلگت بلتستان باندات انجینئر امیر مقام پارینے کہ خیبرپختونخوا نا ساڑی حالیت آتا رد اٹ گورنر راج آئینی و کانودی کسر ءِ‘ ہراڑکن سلاہ کننگ انگ ءِ‘ وخت اس کہ گورنر راج نا باندات ءِ فیصل کریم کنڈی مونی دیک۔ پشاور پریس کلب اٹی صوبائی سرکڑدہ غاتتون اوار پریس کانفرنس کرسا امیر مقام وزیراعلیٰ خیبرپختونخوا سہیل آفریدی آ تنقید کرسا پارے کہ اوفتے لانگ مارچ انا جاگہ غا جیل آ ہننگ نا تیاری کروئی تمک او پارے کہ لانگ مارچ و کارندہ غاتا پن آ ٹھیکیدار و الس آن ارب آ روپئی چندہ نا وڑ اٹ مچ کننگا، ولے داپیسہ غاتا ہچ ءُ ریکارڈ اس اف۔ امیر مقام دوبہ خلک کہ صوبہ ٹی دہشت گردی نا حالیت ترند ءِ ولے خیبرپختونخوا حکومت نا اولیت آک جتا ءُ۔ او پارے کہ صوبائی حکومت بایدے السی ویل و امن و ایمنی آ چکار کے وخت اس کہ پی ٹی آئی نا کنڈآن بانی عمران خان نا یلہ کننگ ءِ بنجائی ویل جوڑ کننگ انگ ءِ او پارے کہ 27 ستمبر نا لانگ مارچ اکن جوان تیاری کننگتویسس و 4 اکتوبر آ ہم ہچ ءُ مارچ اسے نا گمان اف۔ او پارے کہ سہیل آفریدی وزیراعلیٰ ہاؤس آن پیش تمسا کیہی ہندآتا دورہ ءِ کرے و کارندہ تے متحرک کننگ نا کوشست کرے، ولے اودرکار کارندہ غاتا کچ مچ کننگ کتو۔ امیر مقام دوبہ خلک کہ پی ٹی آئی خیبرپختونخوا نا وسیلہ و ٹیکس آتا پیسہ ءِ الس ءِ آسراتی تا فراوانی نا جاگہ غا جلسہ جلوس آتیا خڑچ کننگ اٹی ءِ‘ او صوبائی حکومت نا پولیس ایکٹ آ ہم تنقید کرسا پارے کہ داڑان پولیس افسر آتا تعیناتی ٹی است پسند فیصلہ غاتا کسر ءِ آوار کننگ انگ ءِ او اوغانستان و طالبان تتون مذاکرات نا بابت ہم صوبائی حکومت آ تنقید کرسا دوبہ خلک کہ دا وڑ وڈول اٹ صوبہ ٹی ریاست نا تہٹی ریاست جوڑ کننگ نا کوشست کننگا۔