بلیدہ ٹی اُراٹی زالبول و چناتے شست کننگ مذمت نا قابل ءِ‘مینا مجید

کوئٹہ، صوبائی سلاہکار اسپورٹس و ورنا باندات مینا مجید بلوچ راجی رابطہ نا ویب سائٹ ایکس آ جاری تینا بیان اٹی پارینے کہ ضلع کیچ انا علاقہ الندور، بلیدہ ٹی بی ایل اے نا کنڈ آن اسہ 12 سال انا چناسے برمتہ کننگ و اُراٹی پترینگسا زالبول و چناتے شست کننگ بھاز است ہسونی و مذمت ناقابل ءِ‘ دا واقعہ ٹی اسہ زالبول اس زوال وخت اس کہ چناتتون اوار مسہ پین بندغ ٹھپی مسر۔ او پارے کہ زہمی خاہوت نا فریادی زالبول اینو ہر بلوچ آن خواست کننگ اٹی ءِ کہ او اونا کنڈ آن توار ہرفر و انصاف نا خواست کیر‘ ولے ارمان نا ہیت دادے کہ ہمو بلوچ ہراکہ ناروے، کینیڈا، نیدرلینڈز، برطانیہ و امریکہ ٹی سیاسی پناہ ہلسا رہینگرہ و اقوام متحدہ نا مون آ پلے کارڈ ہرفسا تینے بلوچ حق آتا توار گوندسا غوغا کیرہ، او دا لغوری عمل آ چُپ ءُ۔