قومی زرگزران سوگو و شونداری نا کنڈ آ ہِننگءِ،وزیرِ اعظم شہباز شریف

نیویارک، وزیرِ اعظم محمد شہباز شریف پاکستان ءِ امریکی کاروباری ادارہ غاتے کن زرکاری نا اہم ءُ مزل اس گوندسا پارینے کہ قومی زرگزران سوگو و شونداری نا کنڈ آ ہِننگءِ، پاکستان نا بھلا مارکیٹ و ورنا ہیومن ریسورس ملک اٹ زرکاری کن اہم وڑک ءُ۔ امریکی کاروباری برادری خاص وڑ اٹ ر مینوفیکچرنگ، کشت وکشار، آئی ٹی، اے آئی‘کان کنی و معدنیات تون اوار ایلو بشخ آتیٹی زرکاری نا گیشتر وارخواہی تیان فائدہ ہرفنگ کیک۔ او دا خیال آتا درشانی ءِ امریکی-پاکستان بزنس کونسل و بزنس کونسل آف انٹرنیشنل انڈرسٹینڈنگ نا اسیجائی ڈل اتون اوڑدہی کرسا پارے۔ وزیرِ اعظم ڈل انا بخیر کرسا پارے کہ دا کونسل آک اسلام آباد و واشنگٹن نا نیام اٹ اہم ءُ پول ءُ۔ او پارے کہ امریکہ تون ننا تعلقداری تیٹی گدرینگوک آ اسہ سال اٹی نمان گچینی بسنے ہندا سوب آن داسہ وخت بسنے کہ نن اواری اٹ پاکستان اٹ ساڑی وارخواہی تیا سنجیدگی اٹ سجفن۔ وزیراعظم پارے کہ پاکستان اٹ جتا جتا بشخ آتیٹی بے کچ وارخواہی و لائخیک کاروباری برادری و زرکار آتیکن ہُروک ءُ، نن پاکستان اٹ نمے بخیر کننگ وکل باندات آتیا سرجمی اٹ گپ وتران کن تیار اُن۔ وزیرِ اعظم پارے کہ ننا زرگزران داسہ سوگو مننگ ءِ و نن زرگزرانی شونداری نا کنڈ آ ہِننگ اُن، بدبختی اٹ ساڑی خلیج تنکی ننے مشکل آتا گواچی کرے ولے نن تینا نت تیا سلنگ کن کوشست کننگ اُن۔ او پارے کہ نن امن نا کوشست آتے گچین کننگ کن تینا کل توانائی ءِ خڑچ کننگ اُن۔ او پارے کہ گدرینگوک آ جون اٹی نن مون تروک حالیت آتے گچین جوڑ کننگ اٹ سرسہب مسوسن ولے اوکان پد حالیت آک دُوارہ خراب مننگ نا بنا ءِ کریر، اومیت ءِ کہ سنگت ملک آتا کمک اٹ نن دا حالیت آتے گچین کننگ و ڈیہہ اٹی مدامگی امن برجا تخنگ اٹ سرسہب مرینہ۔ وزیرِ اعظم پارے کہ ڈیہہ اٹی امن و ایمنی مننگ کاروبار و زرکاری نا مونی دننگ کن بھاز اہم ءِ، نن بھلو کچ اسسکان ادارہ ئی صلاحات آتابناءِ کرینن، زرگزران ءِ ڈیجیٹائز کننگ اُن، فیڈرل بورڈ آف ریونیو و ای گورننس کن ترندی اٹ کاریم برجاءِ۔ او کشت و کشارتون اوار ایلو بشخ آتیٹی زرکاری نا پیدواری ءِ کرسا پارے کہ کشت وکشار اولیکو نمبر آٹے، نن کشت وکشار اٹ اے آئی آخا بلکن پوسکنوڑ ٹیکنالوجی و پوسکنوڑ کشاری مشینری نا کاریم اٹ اتنگ نا ہیت ءِ کینہ، ہرافتے ٹی کمبائن ہارویسٹر و ایلو ازباب آک اوار ءُ تانکہ پیداوار و کارکڑد اٹی ودکی مرے، خڑچ آک کم مریر و اسہ اسہ دانہ ءِ رکھ کننگ مرے، دا ہمو بشخ ءِ ہراڑے پاکستان تون اینو ہم زیات لائخی ساڑی ءِ۔