موسمیاتی بدلی نا زہم تتون مون تننگ کن کروک قول تے بایدے پورو کننگے،سینیٹر محمد اورنگزیب

اسلام آباد، بنجائی وزیر خزانہ و محصولات سینیٹر محمد اورنگزیب پارینے کہ موسمیاتی بدلی نا اثر آتون مون تننگ کن کروک آ قول آک الس و کمیونٹی تیکن پبی و عملی نتیجہ غاتیٹی بایدے بدل مریر۔ دا ہیت ءِ او اقوام متحدہ نا جنرل اسمبلی نا سالانہ دیوان نا وخت آ نیویارک اٹی کلائمیٹ امپلی منٹیشن برج انا بابت اڈ ہلوک آ بڑزکو کہول انا دود آن تران کرسا پارے۔ وزیر خزانہ موسمیاتی بدلی نا اثر آتون مون تننگ کن کروک آ قول آتیا گچین عملدرآمد کن مسہ بنداوی خواست آتا پیدواری ءِ کرے، ہرافتے ٹی سوگو پالیسی فریم ورک، مالی وسیلہ غاتسکان رسینگ و ملکی کہول آ ڈٹ آتے عملی دروشم اس تننگ نا لائخی اوار ءِ۔ او موسمیاتی پالیسی نا بابت پاکستان نا پیش رفت و ملکی وسیلہ، جہانی مالیاتی ادارہ غاک، کیپٹل مارکیٹس و موسمیاتی فنڈز انا کمک اٹ مالی وسیلہ غاتے متحرک کننگ نا کوشست آتے ہم مون آ تخا۔ وزیر خزانہ پارے کہ ادارہ ئی بشخنگ و زرکاری نا قابل و مالی کمک دوئی کننگ نا قابل ڈٹ آتا کمتی پدریسہ گچین عملدرآمد اٹی اڑاند ءِ۔ پاکستان اٹی 2022 اٹی بروک آ نوکاپ نا حوالہ ءِ ترسا او پارے کہ جہانی کمک نا قول آتیان پد ہم گچین ڈٹ آتا ساڑی مفننگ نا سوب آن گڑاس مالی وسیلہ غاتے کاریم اٹ اتنگتنے۔ بنجائی وزیر خزانہ برج اٹی پاکستان نا بشخ ہلنگ نا خیرمقدم ءِ کرسا شریدار آتیا زور شاغا کہ او ہمو عملی فیصلہ غاتیا امنائی سلاہ ودی کیر ہرا دا گام ءِ بیرہ ہیت و گپ آن مون آ درسا عملی گام گیج آتا کنڈ آ دے۔