خیبر پختونخوا حکومت دہشگرد آتا کمکار و امن ایمنی ٹی بے سہب مسنے،عطاء اللہ تارڑ

اسلام آباد، بنجائی وزیر حوالکاری وشینکاری عطاء اللہ تارڑ پارینے کہ خیبر پختونخوا ٹی امن وایمنی نا حالیت کل انا مون آٹے‘ صوبائی حکومت نئے بیرہ حالیت آتیان بے سماءِ بلکہ امن وایمنی برجا تخنگ کن بھرمی گام گیج آتیان ہم نروک ءِ‘ سہیل آفریدی وزیراعلیٰ کم و ٹی ٹی پی نا کمانڈر زیات لگک، صوبائی حکومت دہشت گرد آتا کمکاری آن دو کشے‘ خصوصی ہیت و گپ کرسا عطاء اللہ تارڑ دوبہ خلک کہ صوبائی حکومت دہشت گرد آتا کمکاری ءِ کننگ اٹی ءِ او پارے کہ دہشت گرد آک کل سیاسی جماعت آتے شست کریر، ولے تحریک انصاف دہشت گرد آتا برخلاف مذمت و کارروائی آن نرّوک خننگ انگ ءِ‘ بنجائی وزیر حوالکاری پارے کہ دہشت گرد آتا کمکاری کننگ تحریک انصاف نا پالیسی نا بشخ اسے او پارے کہ تحریک انصاف، تحریک طالبان پاکستان نا بی ٹیم و تحریک طالبان اوغانستان نا سی ٹیم ءِ‘ عطاء اللہ تارڑ مستی دوبہ خلک کہ تحریک انصاف وخت اس ہم سیکورٹی فورس آتا ورنا تتون یکجہتی نا درشانی کتنے، او پارے کہ وزیراعلیٰ خیبرپختونخوا سہیل آفریدی، اونا کابینہ و تحریک انصاف نا صوبائی حکومت دہشت گرد آتا کمکار ءُ۔ او پارے کہ خیبر پختونخوا ٹی امن و ایمنی ءِ برجا تخنگ صوبائی حکومت نا زمواری ءِ و تحریک انصاف صوبہ ٹی امن وایمنی ءِ حالیت آتتون مون تننگ کن بایدے بھرمی گام گیج کے۔ بنجائی حوالکاری پارے کہ بیرہ 2026ء اٹ خیبر پختونخوا ٹی 2ہزار456 دہشت گرد جلہو مسر، ہرافتیٹی رینجرز، پولیس و فوج نا 472 کارندہ شہید وخت اس کہ 1500 آن زیات بندغ ٹھپی مسر۔ بنجائی وزیر حوالکاری وشینکاری عطاء اللہ تارڑ وزیراعلیٰ خیبر پختونخوا سہیل آفریدی آ سخت دوبہ خلسا پارے کہ او وزیراعلیٰ کم و تحریک طالبان پاکستان نا کمانڈر زیات خننگک۔ عطاء اللہ تارڑ دوبہ خلک کہ خیبر پختونخوا ٹی ٹمبر و تمباک نا کانود آن چَپ واپاری مننگ اٹی ءِ۔