مچ آ دنیا نا فارماسسٹ آتے فارماسسٹ دے مبارک مرے، ڈاکٹر محمد ظاہر جمالی

کوئٹہ، سینئر ڈاکٹر ٹراما سینٹر کوئٹہ فارمیسی، ڈاکٹر محمد ظاہر جمالی مچ آ دنیا نا فارماسسٹ آتے فارماسسٹ دے انا وخت آ مبارکبادی پیش کرسا پارینے کہ فارماسسٹ آک جان جوڑی نا بشخ اٹ اسہ اہم و بنداوی کڑد اس ادا کننگ ءُ۔ او پارے کہ آب اٹ دوائی تا فراوانی، دوائی تا سہی کاریم اٹ اتنگ، ناجوڑ آتا راہشونی و جان جوڑی نا رکھ اٹ فارماسسٹ آتا خذمت آک ستاکڑزوک ءُ۔ پوسکن طبی نظام اٹ ڈاکٹر، فارماسسٹ و ایلو طبی چاہندار آتا تین پہ تینی کمکاری آن ناجوڑ آتے گچین و جوان درمان نا آسراتی تننگ مریک۔ ڈاکٹر محمد ظاہر جمالی پارے کہ فارماسسٹ آتا کسبی لائخی تے کاریم اٹ اتسا دوائی تا رکھ، گچین و جوان کاریم اٹ اتنگ ءِ پک کننگ آپین چکار کننگ نا گرج ءِ۔ او پارے کہ فارماسسٹ دے دا ارادگی نا پوسکنی نا وارخواہی ءِ کہ الس ءِ آب اٹ جان جوڑی نا آسراتی تا فراوانی ٹی تینا کڑد ءِ پین گچین وڑاٹ ادا کننگے۔ او پاکستان تون اوار مچ آ دنیا نا فارماسسٹ آتے فارماسسٹ دے آ مبارکبادی ترسا اوفتا جان جوڑی نا بشخ اٹ خذمت آتے خراجِ تحسین پیش کرے۔