وزیراعظم فیول ریلیف اسکیم اٹ 58 لکھ بندغ رجسٹرڈ، 61 لکھ ٹوکن جاری مسنو،شزہ فاطمہ

اسلام آباد، بنجائی وزیر انفارمیشن ٹیکنالوجی شزہ فاطمہ پارینے کہ فیول ریلیف اسکیم نا رد اٹ 58 لکھ بندغ رجسٹریشن کرفینو وخت اس کہ 61 لکھ ٹوکن جاری کننگانو۔ وزیر مملکت بلال اظہر کیانی تون اوار پریس کانفرنس کرسا شزہ فاطمہ پارے کہ آزاد کشمیر و گلگت بلتستان تون اوار مچ آ ملک آن الس فیول ریلیف اسکیم آن فائدہ ہرفنگ اٹی ءِ‘ ہر صوبہ نا حساب کتاب ہم بننگ اٹی ءِ کہ ہرا ہرا صوبہ غان اخس الس بننگ اٹی ءِ و ٹوکن کاریم اٹ اتنگ انگ ءِ۔ او پارے کہ ڈیہہ انا حالیت آتا سوب آن پٹرولیم نہاد آتیٹی ودکی مننگ اٹی ءِ‘ ہرانا زہم پاکستان آ ہم تمنگ اٹی ءِ۔ دا مشکل حالیت آتے ہُرسا وزیراعظم پاکستان سبسڈی نا بابت ہرا اسکیم نا بناءِ کریسس، او سرسہبی اٹ برجاءِ۔ شزہ فاطمہ پارے کہ 2 وہیلر، 3 وہیلر کل موٹرسائیکل، رکشہ، چنگچی و 800 سی سی اسکان نا گاڈیک اسکیم نا بشخ ءُ‘ موٹرسائیکل، رکشہ و چنگچی نا صارف آک اگہ اوفتا مالک آک مفس ہم و بیرہ کاریم اٹ اتیرہ تو اوفک ہم تینا رجسٹرڈ فون نمبر و شناختی کارڈ نا کمک اٹ اسہ وار رجسٹریشن کرفسا دا آسراتی ءِ دوئی کننگ کیرہ،خت اس کہ گاڈی تا مالک آک ہم اسکیم نا بشخ مننگ کیرہ۔ او پارے کہ موٹرسائیکل، رکشہ و چنگچی کن 500 روپئی نا ٹوکن ہفتہ ٹی اسہ وار رسینگک‘ داسہ داڑا 5 لیٹر نا پابندی اف، اخس کہ پٹرول شاغفنگے اودے 500 روپئی نا رعایت رسینگک‘ گاڈی تیکن 100 روپئی فی لیٹر نا حساب آن 10 لیٹر آ ہر ٹوکن نا کمک اٹ رعایت تننگک۔ بنجائی وزیر پارے کہ وزیراعظم نا مسخت مشکل حالیت اٹی الس ءِ ریلیف فراوان کننگ ئس، مچ آ کابینہ دا رد اٹ کمک کرے وخت اس کہ نائب وزیراعظم دا اسٹیئرنگ کمیٹی ناکماشی ءِ کننگ اٹی ءِ وخت اس کہ حمزہ شہباز ہم باندات آ تینٹ چکار کننگ اٹی ءِ۔