کوئٹہ صوبہ نا دروشم ءِ، شار انا شونداری مچ آ بلوچستان نا پجار ءِ،وزیراعلیٰ میر سرفراز بگٹی

کوئٹہ ءِ گچین، زیبا و پوسکن ءُ دارالحکومت اس جوڑ کننگ کن دوئی وسیلہ غاتے کاریم اٹ اتینہ، دیوان آن تران

0

Get real time updates directly on you device, subscribe now.

کوئٹہ، وزیر اعلیٰ بلوچستان میر سرفراز بگٹی نا کماشی ٹی کوئٹہ ڈویلپمنٹ پیکج نا بابت اسہ اہم ءُ دیوان اس چیف منسٹر سیکرٹریٹ اٹ اڈ ہلک ہراٹی صوبائی دارالحکومت کوئٹہ نا شونداری، زیبائی و شاری آسراتی تا گچینی کن برجاڈٹ آتا پیش رفت نا جاچ ءِ ہلنگا۔ دیوان اٹ پاننگا کہ کوئٹہ ڈویلپمنٹ پیکیج نا رداٹ 12 ڈٹ آتے پورو کننگانے، 7 ڈٹ آتیا کاریم برجاءِ وخت اس کہ 5 پوسکن ءُ ڈٹ ہم سلاہ کننگانے۔ وزیراعلیٰ میر سرفراز بگٹی برجا ڈٹ آتیا کاریم نا ترندی ءِ پین ترند کننگ نا پارت کرسا پارے کہ شونداری ڈٹ آتا وخت آ پورو مننگ ءِ ہروڑ اٹ پک کننگے۔ او پوسکن سلاہ کروک آ ڈٹ آتیا ہم بے ہُرے آن کاریم نا بناءِ کننگ نا پارت کرے۔ وزیر اعلیٰ پارے کہ کوئٹہ صوبہ نا دروشم ءِ، شار انا شونداری و زیبائی مچ آ بلوچستان نا پجار تون گنڈوک ءِ۔ حکومت کوئٹہ ءِ اسہ گچین، زیبا و پوسکن ءُ صوبائی دارالحکومت اس جوڑ کننگ کن کل دوئی وسیلہ غاتے کاریم اٹ اتیک۔ او پارے کہ کوئٹہ نا مہالو نا زیبائی و تاریخی پجار نا بحالی کن جم حکمت عملی نا رداٹ عملی گام گیج کننگک۔ شار اٹ بنداوی شاری آسراتی تا گچینی، انفراسٹرکچر نا شونداری و رنگ و روغن نا ڈٹ آتے اولیتی بندا تیا پورو کننگے۔ وزیراعلیٰ پارت کرے کہ کوئٹہ ڈویلپمنٹ پیکج نا ڈٹ آتیٹی آب، ترندی و شفافیت ءِ پک کننگے و شونداری کاریم تیٹی سٹی ہرے کننگ آن پاناد کننگے۔ میر سرفراز بگٹی دا عزم انا درشانی ءِ کرے کہ حکومت کوئٹہ ءِ ہندن ءُ زیبا و منظم شار اس جوڑ کننگ کن سنبرینگوک ءِ ہراڑے شاری تے گچین بنداوی آسراتی دو برے و صوبائی دارالحکومت تینا تاریخی و دودوربیدہ ئی پجار تون اوار اسہ پوسکن ءُ شار اسے نا وڑ اٹ ہم نمان مرے۔ دیوان اٹ چیف سیکرٹری بلوچستان شکیل قادر خان، ایس ایم بی آر کمبر دشتی، سیکرٹری خزانہ جہانگیر خان، پروجیکٹ ڈائریکٹر رفیق بلوچ تون اوار تعلقدار کمامدارآک بشخ ہلکر۔

Get real time updates directly on you device, subscribe now.

Leave A Reply

Your email address will not be published.