شاری تا جان و مال انا رکھ ءِ حکومت اولیت آتیٹی اوار کرینے،وزیراعظم شہباز شریف

اسلام آباد، اسلام آباد پولیس ءِ پوسکنوڑ‘ رکھوک و و چاگڑد دوست پولیسنگ نا شون تننگ کن 50 الیکٹرک گاڈی فراوان کننگانو۔ اسلام آباد اٹی اڈ ہلوک دود اٹی وزیراعظم محمد شہباز شریف الیکٹرک گاڈی تا کلیت آتے بنجائی وزیر داخلہ محسن نقوی و انسپکٹر جنرل اسلام آباد پولیس سید علی ناصر رضوی ءِ تس۔ بنجائی حوالکاری وشینکاری وزیر عطا اللہ تارڑ، بنجائی وزیر ڈاکٹر طارق فضل چوہدری و وزیر مملکت طلال چوہدری تون اوار تعلقدار بڑزکو کمامدار آک دود اٹی ساڑی ئسر۔ وزیراعظم محمد شہباز شریف دا وخت آ ہیت وگپ کرسا پارے کہ شاری تا جان و مال انا رکھ حکومت نا اولیکو اولیت ءِ۔ حکومت اسلام آباد پولیس ءِ پوسکنوڑ پولیسنگ نا خواست آتتون ہم گرنچ کننگ کن وس انا کچ آ وسیلہ فراوان کننگ اٹی ءِ۔ وزیراعظم اسلام آباد پولیس ءِ پوسکنوڑ خواست آتتون ہمگرنچ کننگ نابابت بنجائی وزیر داخلہ محسن نقوی نا کارکڑد نا ستاءِ کرے و پارے کہ اسلام آباد پولیس ءِ ملک انا ایلو شارک بایدے رول ماڈل جوڑ کیر۔ بنجائی دارالحکومت اٹی شاری تے رکھوک چاگڑد نا فراوانی کن پولیس ءِ پوسکنوڑ ٹیکنالوجی, گڑا و ایلو المی وسیلہ غاتیان شُپ کننگ انگ ءِ۔ وزیراعظم پارے کہ اسلام آباد پولیس ءِ تروک الیکٹرک گاڈی تا مسخت پولیسنگ نا نظام اٹی چاگڑد دوست و گرین پولیسنگ ءِ شون تننگ ءِ۔ پوسکنوڑ ٹیکنالوجی نا کاریم اٹ اتنگ آن پولیس نا کارکڑد شاری تے فراوان کروک خذمت اٹی پین گچینی بریک۔ دا وخت غا انسپکٹر جنرل اسلام آباد پولیس وزیراعظم ءِ بنجائی دارالحکومت نا سیکورٹی کن جوڑ کروک پوسکن آ فورس ‘کیپیٹل پٹرول’ نا باورو اٹ جم بریفنگ تس۔ وزیراعظم ءِ پاننگا کہ دا پوسکن آ فورس وزیراعظم نا رکھوک، سمارٹ و گرین کیپیٹل نا وژن نا رِداٹ جوڑ کننگانے۔ کیپیٹل پٹرول فورس اٹی جم وڑ اٹ 200 پولیس کارندہ اوار ءُ۔ کیپیٹل پٹرول فورس نا ہر پٹرول یونٹ اٹی اسہ نرینہ و اسہ زالبول پولیس کارندہ اس تعینات مریک۔ فورس اٹی موٹر سائیکل سوار پولیس کارندہ غاک ہم اوار مریرہ تاکہ جتا جتا علاقہ غاتیٹی دمدستی ورندی و گشت ءِ سوگو جوڑ کننگ مرے۔ وزیراعظم ءِ مستی پاننگا کہ کیپیٹل پٹرول فورس انا کل کارندہ غاتے باڈی کیمرہ تننگک۔ ہراڑان پولیسنگ نا کاریم اٹی شفافیت، مانیٹرنگ و پرسجو ءِ پین بھرمی جوڑ کننگے۔ بریفنگ اٹی پاننگا کہ کیپیٹل پٹرول فورس اکن 50 الیکٹرک گاڈی فراوان کننگانو۔ کل گاڈیک بجلی اٹ چلینگرہ ہراڑان ایندھن نا خڑچ اٹی نمان کمتی تون اوار چاگڑد آ ہم جوان زہم تالان مریک۔ وزیراعظم ءِ پاننگا کہ الیکٹرک گاڈی تا کاریم اٹ اتنگ آن ایندھن نا رد اٹ تو انا ہچ مف 3 کروڑ 40 لکھ روپئی نا بچت مریک، وخت اس کہ اسہ گاڈی اسے نا نہاد دَہ ونیم تُو اٹ ایندھن نا بچت آن پورو مریک۔ وزیراعظم اسلام آباد پولیس نا کنڈ آن پوسکنوڑ ٹیکنالوجی نا کاریم اٹ اتنگ، گرین پولیسنگ نا شون و شاری تا رکھ اکن کروک گام تا ستاءِ کرے و پارت کرے کہ پوسکنوڑ پولیسنگ نا نظام ءِ پین بھرمی کننگ کن کل المی گام گیج آتے پک کننگے۔