انصاف نا اصل آب ہرشاری ءِ انصاف اسکان رسیفنگ کن کسر تننگ ءِ،چیف جسٹس یحییٰ خان آفریدی

کوئٹہ، چیف جسٹس آف پاکستان جسٹس یحییٰ خان آفریدی پارینے کہ عدلیہ ءِ روایتی کورٹ سینٹرک نظام آن پیش تمسا سٹیزن سینٹرک جوڑ کروئی مریک، انتئے کہ انصاف نا اصل آب دادے کہ ملک انا ہر شاری ءِ بے فرق، آسان، ترند و گچین انصاف اسکان رسینگ دو برے۔ ٹیکنالوجی انصاف نا فراوانی نا وڑ وخت اس کہ انصاف اصل مسخت ءِ، ہندا سوب آن ڈیجیٹل نظام ہمووخت آ گچین مریک ہراتم او انصاف ءِ پین ترند، شفاف و انسانی خواست آتتون ہم گرنچ کے، السی سہولت مرکز نا جوڑ کننگ بیرہ اسہ ماڑی یا آسراتی اسے نا بنا آخا بلکن دا بنداوی عزم انا عملی درشانی ءِ کہ انصاف ہر شاری نا دوٹی مرے۔ دا خیال آتا درشانی ءِ او دوشنبے نادے آ بلوچستان ہائیکورٹ کوئٹہ نا دنگ اٹی پوسکن جوڑ مروک السی سہولت مرکز نا بناءِ کننگ نا وخت آ تران کرسا کرے۔ بنائی دود اٹی بنجائی آئینی عدالت نا جج جسٹس روزی خان بڑیچ، سپریم کورٹ نا جج جسٹس جمال خان مندوخیل، جسٹس نعیم اختر افغان و جسٹس محمد ہاشم خان کاکڑ، بلوچستان ہائیکورٹ نا جج جسٹس اقبال کاسی، جسٹس گل حسن ترین، جسٹس سردار احمد حلیمی، جسٹس شوکت علی رخشانی، جسٹس محمد عامر نواز رانا، جسٹس عبد القیوم لہڑی و جسٹس اللہ داد روشان، رجسٹرار بلوچستان ہائیکورٹ ناصر خان یوسفزئی، ایڈیشنل چیف سیکرٹری ترقیات زاہد سلیم، ایڈیشنل چیف سیکرٹری داخلہ محمد حمزہ شفقات، سیکرٹری خزانہ محمد جہانگیر کاکڑ، سیکرٹری تعمیرات و مواصلات بابر خان، آئی جی پولیس بلوچستان محمد طاہر، بلوچستان بار کونسل نا باسک ٓک افضل حریفال ایڈووکیٹ و راحب بلیدی، بلوچستان ہائیکورٹ بار ایسوسی ایشن نا صدر میر عطاء اللہ لانگو، جنرل سیکرٹری سید نجب الدین آغا، ایلو عہدیدار و وکیل آتا بھلو کچ اس ساڑی ئس۔ دا وخت آ شہید ڈسٹرکٹ اینڈ سیشن جج عبدالحکیم کاکڑ و ایلو شہید وکیل آتا روح انا ثواب کن دعا پاتیا ہم کننگا۔ چیف جسٹس پاکستان سہولت مرکز نا بناءِ کرے و اونا جتا جتا بشخ آتا دورہ ءِ کرسا سُوالی و وکیل آتے کن فراوان کروک آسراتی تا جاچ ءِ ہلک۔ دود آن تران کرسا جسٹس یحییٰ آفریدی بلوچستان ہائیکورٹ نا چیف جسٹس جسٹس محمد کامران خان ملاخیل ءِ سہولت مرکز نا جوڑ کننگ آ مبارکبادی ترسا پارے کہ دا گام نظام انصاف اٹی گیشتر بدلی نا کنڈآ اسہ اہم پیش رفت اسے، ہرا نا مسخت عدالت نا دامون ایمون پیری کنوک آ نظام ءِ شاری مرکزیت نا نظام اٹ بدل کننگ ءِ۔ او پارے کہ ٹیکنالوجی ءِ عدالتی نظام اٹی گچین وڑ اٹ کاریم اٹ اتنگ انصاف تننگ ءِ پین رسینگ نا وڑ اٹ‘ گچین و سُوالی تا گرج آتا رداٹ جوڑ کننگ نا اہم وڑ ءِ۔