الس نا جان و مال انا رکھ ءِ پک کننگ اولیت آتیٹی اوار ءِ،ایس پی ہرنائی

ہرنائی، ضلع ٹی امن وایمنی ءِ برجا تخنگ و الس نا جان و مال انا رکھ ءِ پک کننگ کن ہرنائی پولیس پورو وڑاٹ الرٹ خننگ انگءِ‘ دا رد اٹ ایس پی ہرنائی انجینئر عبدالحفیظ جکھرانی تدوک آ نن ہرنائی بازار نا ہلہلہ ئی دورہ ءِ کرسا سیکیورٹی بست وبند آتا جم جاچ ءِ ہلک۔ ضلع ٹی امن وایمنی نا حالیت آتے جوانی نا کنڈ آ دننگ و پولیس کارندہ غاتا الرٹنس نا جاچ ءِ ہلنگ کن ایس پی ہرنائی انجینئر عبدالحفیظ جکھرانی ہرنائی بازار و شار انا جتا جتا حساس آ ہند آتا ہلہلہ ئی دورہ ءِ کرے۔دا وخت آ او ڈغار کہول آ تعینات پولیس کارندہ غاتا ساڑی گری و پیٹرولنگ ٹیم آتا کارکڑد نا تینٹ جاچ ءِ ہلک‘ تینا دا دورہ نا وخت آ ایس پی ہرنائی شار انا جتا جتا سیکورٹی پوائنٹ، ناکہ و جتا جتا تھانہ غاتا پیٹرولنگ ٹیم آتا چیکنگ ءِ کرے۔ او وخت آ ساڑی پولیس کارندہ غاتا ڈیوٹی و حاضری نا جاچ ءِ ہلسا زمواری تے گچین و جوانی اٹ سرتننگ نا پارت کرے ڈیوٹی آ ساڑی کارندہ غاتتون ہیت وگپ کرسا ایس پی عبدالحفیظ جکھرانی پارت کرے کہ شار اٹی ہر وڑانا بے چیٹ واقعہ اسے تون مون تننگ کن کل کارندہ غاک 24 گھنٹہ الرٹ مریر۔ سیکورٹی نا بابت جاری کروک پارت و ایس او پی تیا سختی اٹ عملدرآمد ءِ پک کننگے۔ شکبر بندغ و گاڈی تیا نظر تخنگے تانکہ ڈوہدار بندغ آتا چٹفنگ ءِ پک کننگ مرے۔ دورہ نا وخت آ ایس پی انجینئر عبدالحفیظ جکھرانی دا ہیت نا دوارگی ءِ کرے کہ الس نا جان و مال انا رکھ و ضلع ٹی پرامن چاگڑد برجا تخنگ ہرنائی پولیس نا اولیکو اولیت ءِ۔ او پیدوار کرے کہ زمواری تا سرتننگ اٹ ہچ وڑ انا ڈیوالئی اسُل سگنگ مفک۔ ایس پی ہرنائی نا دا ہلہلہ ئی دورہ غان ہراڑے پولیس محکمہ ٹی پین گچینی و تحرک خننگا، ہموڑے ہندی الس اٹی ہم رکھ و است جمی نا احساس بیدار مس۔