ضلع چاغی ٹی سد آ خاہوت آتا شناختی کارڈ آک بلاک، مخلوق فریشان

ضلع چاغی ٹی نادرا نا کنڈ آن سد آ خاہوت آتا قومی شناختی کارڈ آتے بلاک کننگ آ الس اٹی بھاز گڑتی تالان مسنے‘ کمامدار آک نوٹس ہلیر‘ سرجم حوال آتا رِد اٹ نادرا نا دا گام آن طالب علم سرکاری ملازم، بینک کھاتہ دار، پوریاگر اجر برادری، پینشنرز و بینظیر انکم سپورٹ پروگرام نا حقدار آتتون اوار ہزار آ بندغ آک زہمی مسنو۔ شناختی کارڈ بلاک مننگ نا سوب آن شاری بینک، تعلیم، درمان و ایلو سرکاری باندات آتے ٹی مشکل مسنے۔ زہمی شاریک پارینو کہ اگہ اسہ خاہوت اسے ٹی درملکی اس اوار مسنے تو بیرہ اودے کشنگے مچ آ خاہوت ءِ انتئے بلاک کننگ انگ ءِ‘ نادرا نا وڑ و ڈول محب وطن پاکستانی شاری تتون بے انصافی اسے۔ او پاریر کہ ضلع چاغی نا الس مدام ملک انا سلامتی و دفاع کن قربانی تسنے‘ سیمی ضلع مننگ آن پد ہم دا جاگہ نا پرامن و کانود نا پابندءِ‘ شاریک چیف آف آرمی اسٹاف جنرل سید عاصم منیر، وزیراعلیٰ بلوچستان میر سرفراز بگٹی و نادرا نا بڑزکو کمامدار آتیان خواست کریر کہ ضلع چاغی نا بلاک شناختی کارڈ آتا دمدستی بحالی نا پرمان جاری کننگے و دا باندات نا شفاف جاست پاست کننگے تانکہ ہزار آ زہمی خاہوت آتے ریلیف رسینگے۔ چاغی (نامہ نگار)