مکہ اسیجائی دفاعی معاہدہ تین پہ تینی شریداری ءِ پین سوگو کیک،کمشنر نصیرآباد ڈویژن

صیرآباد پاکستان، سعودی عرب و ترکیہ نا نیام اٹی ایلمی تعلقداری و دفاعی کمکاری نا درشانی کن نصیرآباد اٹی خصوصی گام گیج کننگا۔ پاکستان، سعودی عرب و ترکیہ نا نیام اٹی ساڑی دفاعی کمکاری، تین پہ تینی اسیجائی و ودوک آ ایلمی تعلقداری تا درشانی کن ضلع نصیرآباد اٹی ہم خیرسگالی، یکجہتی و دوستی نا جوزہ نا رِد اٹ خصوصی گام گیج کننگانے۔ کمشنر نصیرآباد ڈویژن صلاح الدین نورزئی و ڈپٹی کمشنر نصیرآباد وریندر لعل نا پارت آ شار انا اہم انگا شاہراہ، سرکاری ماڑی و السی ہند آتیا زیبا و بھاز گچین ءُ پینا فلیکس خلنگا ہرافتیا پاکستان، سعودی عرب و ترکیہ نا قومی بیرک آتے نمان وڑاٹ پاش کننگانے۔ پینا فلیکس آتیا ہر مسٹ آ ایلم ملک آتا نیام اٹی دوستی، ایلمداری، سیوت، تین پہ تینی پت و اسیجائی سلامتی نا عزم انا پیدوار کروک کلہو آک ہم نوشتہ ءُ۔ دا گام تا مسخت نئے بیرہ پاکستان، سعودی عرب و ترکیہ نا نیام اٹی تاریخی تعلقداری تے پاش کننگ ءِ بلکن السی کہول آ ساڑی مہر، عقیدت، شرف و متکن آ ایلمی خڑکی تا جوزہ غاتے پین شون تننگ ءِ۔ دا کلہو ہم نمان کننگانے کہ ہرمسٹ آ ملک آتا تعلقداری بیرہ سفارتی تعلقداری اسکان کچ اٹ اف بلکن تین پہ تینی پت‘ اسیجائی اقدار و السی جوزہ غاتا سوگو بنجا غا تالان ءِ‘۔ داوخت آ ڈپٹی کمشنر نصیرآباد وریندر لعل تینا کلہو اٹی پارے کہ پاکستان نا سعودی عرب و ترکیہ تون تعلقداری بیرہ سفارتی وڑ انا اف بلکن تاریخ، ثقافت، مذہبی وابستگی، تین پہ تینی شرف و ایلمی جوزہ غاتیا تالان کڑمب و متکن آ رشتہ غاک ءُ۔ دا تعلقداری تا ماسک ہڑتوم آ ملک آتا الس نا است آتیٹی سوگو وڑاٹی ءُ و سخت انگا ہر ساہت اٹ اسہ ایلو تون اوار سلنگ نا کیہی عملی درور آک دا متکن آ سنگتی نا سوگوی نا شاہدی ءُ۔ او پارے کہ ساڑی دفاعی کمکاری و تین پہ تینی اسیجائی ہر مسٹ آ ملک آتا نیام اٹی ودوک آ پت‘ اسٹریٹجک ہم گرنچی و اسیجائی فائدہ نا پاش درشانی ءِ کیک۔دا معاہدہ نئے بیرہ ڈیہہ اٹی امن، سلامتی و سوگوی نا شون اکن اہم ءِ‘ مسلم دنیا ٹی سیوت، یکجہتی و تین پہ تینی کمکاری نا جوزہ ءِ ہم سوگو کیک۔ ڈپٹی کمشنر مستی پارے کہ پاکستانی الس سعودی عرب و ترکیہ ءِ مدام تینا مخلص، پتدار‘ خڑک ایلم ملک آتا وڑ اٹ ہُرک۔ ہر مسٹ آ ملک آتا نیام اٹی ساڑی دا سوگو آ رشتہ وخت تون اوار پین سوگو مسنے و تین پہ تینی کمکاری، اسیجائی گام گیج و پدریسہ رابطہ غاتا کمک اٹ آخبت اٹی ہم دا سنگتی پوسکن آ بڑزی تسکان سر مریک۔ او دا عزم انا درشانی ءِ کرے کہ پاکستان، سعودی عرب و ترکیہ نا نیام اٹی مہر، اخوت، تین پہ تینی پت و کمکاری نا دا رشتہ بروک آ چین تسکان ہندا جوزہ و سوگوی اٹ برجا سلک۔ وخت اس کہ مسٹ آ ایلم ملک آک ڈیہہ و دنیا ٹی امن، شون و سوگوی کن تینا مثبت کڑد ءِ برجا تخرہ۔