کمشنر لورالائی نا پارت آ مکہ ٹی پک مروک تاریخی اسیجائی معاہدہ نا خوشی ٹی لورالائی ٹی خصوصی فٹبال میچ
Get real time updates directly on you device, subscribe now.
ورالائی، پاکستان، سعودی عرب و ترکیہ نا نیام اٹی مکہ مکرمہ ٹی پک مروک تاریخی اسیجائی دفاعی معاہدہ نا خوشی ٹی ضلعی انتظامیہ لورالائی نا کماشی ٹی بوائز کالج فٹبال گراؤنڈ لورالائی اٹی اسہ خصوصی فٹبال میچ اسے نا بست و بند کننگا۔ ڈپٹی کمشنر لورالائی کیپٹن (ر) محمد حسیب شجاع نا پارت آ اڈ تروک فٹبال میچ اٹی کوئٹہ و لورالائی نا ٹیم آک بشخ ہلکر۔ میچ نا اڈ تننگ نا مسخت ہر مسٹ آ ایلم ملک پاکستان، سعودی عرب و ترکیہ نا نیام اٹی ایلمداری، یکجہتی و باہمی کمکاری نا جوزہ ءِ پیدوار کننگ و تاریخی معاہدہ نا خوشی ءِ اڈ تننگ ئس۔ ڈپٹی کمشنر لورالائی کیپٹن (ر) محمد حسیب شجاع پارے کہ مکہ مکرمہ ٹی 7 اگست 2026 آ پک مروک اسیجائی دفاعی معاہدہ پاکستان، سعودی عرب و ترکیہ نا نیام اٹی سوگو ایلمی تعلقداری و اسیجائی سلامتی نا عزم انا ڈیک ءِ۔ دا معاہدہ ڈیہہ اٹی امن، سلامتی و سوگوی ءِ شون تننگ نا کنڈ آ اسہ اہم ءُ پیش رفت اسے۔ او پارے کہ گوازی ورنا چین ءِ مثبت سرجز آتا کنڈ آ دنننگ تون اوار راج اٹی سیوت، ایلمداری، سگ و ہم گرنچی ءِ شون تننگ نا بھرمی ءُ وسیلہ اسے۔ لورالائی ٹی خصوصی فٹبال میچ نا اڈ تننگ ہندا جوزہ نا درشانی ءِ کیک۔کیپٹن (ر) محمد حسیب شجاع پارے کہ پاکستان، سعودی عرب و ترکیہ نا الس نا نیام اٹی مہر و ایلمداری نا متکن آ اسٹیک ساڑی ءُ و دا وڑ انا مثبت گام گیج دا تعلقداری تے پین سوگو کننگ اٹی اہم کڑد ادا کیرہ۔ او دا عزم انا درشانی ءِ کرے ک ضلعی انتظامیہ لورالائی ورنا چین ءِ جانجوڑ و مثبت سرجز آتیکن پورو وارخواہی فراوان کرسا کیک‘ دا وخت آ گوازی گر و ہروک آک پاکستان، سعودی عرب و ترکیہ نا نیام اٹی سنگتی‘ سیوت و ایلمداری نا جوزہ غاتا درشانی ءِ کرسا امن، سوگوی و آسودہی نا کلہو تسر۔