السی ویل و شونداری ڈٹ آتیا جم سجفنگ بلوچستان نا شون و الس نا آسودہی ننا اولیکو اولیت ءِ،مولانا ہدایت الرحمان

گوادر، بلوچستان صوبائی اسمبلی نا باسک مولانا ہدایت الرحمن بلوچ اورماڑہ نا دورہ ءِ کرے، ہراڑے او پارٹی کارندہ غاتتون اوار اسسٹنٹ کمشنر اورماڑہ ڈاکٹر ماہ نور برکت تون اونا دفتر اٹی اوڑدہی کرے۔ دا وخت آ تحصیلدار اورماڑہ نورجان ہم ساڑی ئسکہ۔ اوڑدہی ٹی اورماڑہ نا السی ویل، انتظامی باندات‘ بنداوی آسراتی تا فراوانی و برجا شونداری گام گیج آتیا جم و خوڑتی اٹ گپ وتران کننگا۔ صوبائی اسمبلی ناباسک پارے کہ بلوچستان نا شون و الس نا آسودہی ننا اولیکو اولیت ءِ۔ ننا سیاست نا بنجا السی خذمت ءِ‘ اورماڑہ ضلع گوادر نا اہم ءُ بشخ اسے، داڑے الس ءِ جانجوڑی، تعلیم، سفا انگا دیر، بجلی و روزگار کون آ بنداوی آسراتی تا فراوانی کن ہر ور انا گام گیج کننگک۔ او اسسٹنٹ کمشنر اورماڑہ نا کنڈ آن السی ویل آتا ایسری کن مروک کوشست آتا ستاءِ کرے و اومیت درشان کرے کہ انتظامیہ و السی نمائندہ غاک اواری اٹ علاقہ نا شون کن تینا کڑد ءِ ادا کرسا کیک۔ اسسٹنٹ کمشنر اورماڑہ ڈاکٹر ماہ نور برکت صوبائی اسمبلی نا باسک انا منتواری ءِ ہرفسا باور کرفے کہ السی غاو تا دمدستی ایسری، میرٹ آ تالان انتظامی فیصلہ و شونداری ڈٹ آتا شفاف پوروی کن انتظامیہ پورو وڑ اٹ متحرک ءِ‘ اوپارے کہ الس و انتظامیہ نا نیام اٹی رابطہ غاتے پین سوگو کرسا اورماڑہ ءِ شونداری نا کسر آروان کننگک۔