پاکستان و بیلاروس نا تعلقداری تیٹی بھلو گچینی اس بسنے، جام کمال خان

اسلام آباد، بنجائی وزیر واپار جام کمال خان تون بیلاروس نا سفیر آندرے میتیلیتسا اوڑدہی کرے، ہراٹی ہڑتوم آ کنڈآتا اقتصادی تعلقداری و پاکستان۔بیلاروس اسیجائی وزارتی کمیشن نا بروک آ دیوان نا تیاری تا جاچ ءِ ہلنگا۔ وزارت آن جاری بیان نا رداٹ بنجائی وزیر واپارو بیلاروس نا سفیر ہڑتوم آ کنڈآتا رابطہ غاتیٹی ودوک آ پیش رفت آ است جمی نا درشانی ءِ کریر و واپار، زرکاری و صنعتی کمکاری ءِ پین سوگو کننگ نا تینا عزم انا درشانی ءِ کریر۔ بنجائی وزیر واپارپارے کہ پاکستان نا وزیراعظم و بیلاروس نا صدر نا نیام اٹ گچین تعلقداری ہڑتوم آ کنڈآتا تعلقداری ءِ سوگو کرینے۔ او پارے کہ ہڑتوم آ ملک آتا سرکڑدہ غاتا نیام اٹ تین پہ تینی مفاہمت و پدریسہ رابطہ غاک چندی بشخ آتیٹی عملی کمکاری کن پوسکن ءُ کسر ملانو۔ ہیت و گپ اٹی ہڑتوم آ کنڈآتا واپاری ءِ آسان کننگ و ہڑتوم آ ملک آتیٹی کاروباری ادارہ غاتا کمکاری کن عملی مالی بست وبند آتا بابت گپ وتران کننگا۔ فریق آک داہیت آ امنا کریر کہ تعلقدار مالی ادارہ و تکنیکی چاہندار آک رکھ و تین پہ تینی وڑ اٹ قابل قبول زرتس نا وڑوڈول ہندی کرنسی ٹی تصفیہ و ایلو بدل گیگ بست وبند آتیا سلابت ءِ برجا تخرہ۔ او پارے کہ پاکستان و بیلاروس نا نیام اٹ کشت وکشار، کھد، انجینئرنگ مصنوعات، ٹیکٹر، بھلا مشینری، توانائی نا مصنوعات و غذائی اجناس نا بشخ آتیٹی کمکاری نا نمان وارخواہی ارے۔ بیلاروس نا سفیر بنجائی وزیر ءِ معلومدار کرے کہ بیلاروس اٹ ملازمت کروک پاکستانی کارندہ غاتا کچ اٹی نمان ودکی مسنے وخت اس کہ کسبکار کارندہ غاتا خواست اٹی پدریسہ ودکی مننگ ءِ۔ فریق آک پاکستانی کارندہ غاتے کن روزگار نا وارخواہی تے پین ودفنگ کن شفاف بھرتی، مناسب چاہنداری تا وڑ اٹ و ادارہ ئی کہول آ خڑک ہم گرنچی ءِ مون آ دننگ آ امنا کریر۔ بنجائی وزیر واپاربیلاروس نا پوسکن انجینئرنگ و صنعتی لائخی خاص وڑ اٹ ٹیکٹر، ٹرک و کشاری مشینری نا پیداوار نا ستاءِ کرے و دا بشخ آتیٹی کمکاری نا پدریسہ بحالی ءِ گچین گوندا۔ اوڑدہی ٹی بیلاروس نا وزیر نا بروک آ دورہ و اسیجائی وزارتی کمیشن نا تیاری تا بابت ہم ہیت و گپ کننگا۔ فریق آک داہیت آ امنا کریر کہ بروک آ رابطہ غاتیان عملی کمکاری ءِ مونی دننگ، واپار نا بابت باندات آتے ایسر کننگ و اقتصادی شریداری نا پوسکن آ بشخ آتا پیدواری ءِ کننگ آن فائدہ ہرفنگے۔