اسماء جتک کیس انسانی حق انا سنجیدہ باندات اسے، گوجالنگ مفک،ڈاکٹر ربابہ خان بلیدی

کوئٹہ، بلوچستان نا وزیراعلیٰ نا سلاہکار ویمن ڈویلپمنٹ ڈیپارٹمنٹ ڈاکٹر ربابہ خان بلیدی پارینے کہ اسماء جتک کیس انسانی حق انا بابت اسہ سنجیدہ و گڑتی نا سوب باندات اسے، ہرادے ہچ ءُ کہول اسے آ چنک یا گوجالنگ مفک۔ بلوچستان نا زہمی مسڑ انصاف خواہنگ ءِ و ہر شعور تخوک آ بندغ ءِ ہروڑ انا مصلحت آن ایڑتر مرسا حق و انصاف تون تفوئی مریک۔ تینا اسہ جاری بیان اسے ٹی ڈاکٹر ربابہ خان بلیدی پارے کہ وزیراعلیٰ بلوچستان میر سرفراز بگٹی زہمی خاہوت تون پدریسہ رابطہ ٹی ءِ وخت اس کہ محکمہ داخلہ ہم دا باندات آ پورو وڑ اٹ متحرک ءِ۔ حکومت بلوچستان اسماء جتک نا خاہوت ءِ انصاف تننگ کن کل گمانی گام گیج آتے پک کننگ ءِ۔ او پارے کہ حکومت بلوچستان انسانی حق، زالبول و چناتا رکھ انا بابت تینا زمواری تیان جوانی اٹ معلومدار ءِ اسہ ہم زہمی شاری اسے انصاف نا دوئی کننگ اٹ تنیا الیپک۔ اسماء جتک کیس اٹ کانود نا خواست آتا رداٹ شفاف و گچین کارروائی ءِ پک کننگک۔ سلاہکار ویمن ڈویلپمنٹ پارے کہ زالبول و چناتا برخلاف ہر بیدادی یا بے انصافی ءِ سگنگ مفک۔ راج انا کل تپہ غاتے دا وڑ انا حساس باندات آتیٹی زمواری نا درشانی ءِ کرسا زہمی تا توار مروئی ءِ و اوفتے انصاف نا فراوانی کن تینا کڑد ءِ ادا کننگے۔ ڈاکٹر ربابہ خان بلیدی پارے کہ اسماء جتک ءِ ضرور انصاف ملک، حکومت بلوچستان دا باندات آسنجیدہ ءِ و زہمی خاہوت تون سلوک ءِ۔ او پارے کہ انصاف تننگ ریاست نا بنداوی زمواری ءِ و دا کیس اٹ کانود و انصاف نا خواست آتے ہروڑ اٹ اولیت تننگک۔